Mijëra njësi të një produkti medicinal janë gjetur pa banderola në depon e kompanisë “Medical Group”, gjatë një inspektimi të kryer nga Inspektorati Farmaceutik, ndërsa një pjesë e tyre kishte përfunduar edhe në treg.
Bëhet fjalë për 4,650 kuti të barit “Pulmicort 0.25 mg/ml”, i cili përdoret për uljen e inflamacionit në rrugët e frymëmarrjes. Ky produkt është gjetur pa banderola, element i detyrueshëm për qarkullim të ligjshëm në Kosovë, gjatë kontrollit të realizuar në depo, raporton Front Online.
Sipas raportit të Inspektoratit Farmaceutik, të cilin e ka siguruar portali, më 11 qershor 2025 është kryer inspektim në këtë depo lidhur me produktin në fjalë. Në raport thuhet se “Pulmicort 0.25 mg/ml” ishte shpërndarë paraprakisht edhe në barnatoret “Zana” në Prizren dhe “LM Kushtrimim”, njësia nr. 8 në Prishtinë, pa banderola.
Gjatë kontrollit në hapësirat e deponimit, inspektorët kanë konstatuar një sasi të konsiderueshme prej 4,650 kutish (me nga 20 ampula secila) pa banderola, për çka është urdhëruar karantinimi i menjëhershëm i të gjithë produktit.
Në momentin e inspektimit, depoja ishte funksionale dhe e hapur, ndërsa e pranishme ishte farmacistja përgjegjëse. Sipas deklarimeve të palës, barnatoret në Prishtinë dhe Prizren ishin furnizuar me këtë produkt pa banderola.
Rasti ka nxitur reagim institucional. Më 10 korrik 2025, përmes një njoftimi zyrtar, përgjegjësi i depos ka bërë të ditur se Agjencia për Produkte dhe Pajisje Medicinale (AKPPM) kishte lëshuar banderolat për produktin në fjalë.
Vetëm një ditë më vonë, më 11 korrik 2025, Inspektorati Farmaceutik ka rikontrolluar depon, duke konstatuar se banderolat ishin vendosur nga stafi dhe produkti ishte liruar për qarkullim.
Megjithatë, ndërkohë është konfirmuar se 237 njësi të produktit pa banderola janë tërhequr nga tregu, çka nënkupton se një pjesë e barnave kishte arritur deri te pacientët jashtë kontrollit të plotë ligjor.
“Medical Group”: Produkti ishte i ligjshëm, problemi lidhet me çmimin
Të kontaktuar nga Front Online, përfaqësues të kompanisë “Medical Group” kanë reaguar ndaj këtyre pretendimeve, duke i cilësuar ato si interpretime të pasakta të situatës.
Në një përgjigje zyrtare, kompania thekson se produkti është importuar plotësisht në mënyrë të ligjshme, me leje importi nga autoritetet kompetente, i shoqëruar me Certifikatë Analize (CoA)dhe me Autorizim për Marketing në Republikën e Kosovës.
Sipas kompanisë, çështja nuk lidhet me mungesën e banderolës si e tillë, por me mungesën e banderolës me çmim të shënuar, e shkaktuar nga vonesat institucionale në përcaktimin e çmimeve.
“Çmimi i publikuar fillimisht ka qenë më i ulët se çmimi i importit (CIP), për çka kompania ka ushtruar ankesë. Vendimi pozitiv nga komisioni përkatës ka ardhur me disa javë vonesë”, thuhet në reagimin e kompanisë.
Kompania shton se, pavarësisht se institucionet kanë qenë të informuara për situatën, Inspektorati Farmaceutik ka shqiptuar një gjobë mandatore, e cila është paguar, ndërsa rasti është dërguar në procedurë gjyqësore në Gjykatën Komerciale në Prishtinë.
Sipas “Medical Group”, e gjithë situata është administrative dhe procedurale, e shkaktuar nga paqartësitë dhe vonesat në sistemin e vendosjes së çmimeve referuese në atë periudhë.
“Ky rast në asnjë rrethanë nuk lidhet me futje të produkteve në treg jashtë kontrollit shtetëror”, thuhet më tej në reagim.
Në fund, kompania thekson se të gjitha aktivitetet e saj të importit dhe distribuimit janë të rregulluara, të dokumentuara dhe të mbikëqyrura nga autoritetet kompetente, duke shtuar se mbetet e hapur për bashkëpunim dhe sqarime shtesë.
