Anëtari i kryesisë së Lidhjes Demokratike të Kosovës (LDK), Muhamet Hamiti, ka deklaruar se Lëvizja Vetëvendosje mbledhjen e Këshillit të Përgjithshëm e ka mbajtur në objektin e Administratës Qendrore të Universitetit të Prishtinës (UP).
Hamiti këtë e deklaroi me anë të një shkrimi në ‘Facebook’, ku theksoi se kjo praktikë është parë për të parën herë nga VV’ja, shkruan Insajderi.
“Partia në pushtet, Lëvizja Vetëvendosje, e paska mbajtur mbledhjen e sotme të Këshillit të saj të Përgjithshëm në ambiente të Universitetit të Prishtinës (UP)… S’më kujtohet që parti të tjera politike të Kosovës të kenë mbajtur mbledhje të tilla në hapësirat e UP-së”, deklaroi ndër të tjera ai.
Hamiti shtoi se kjo s’është hera e parë që VV’ja po e bën një gjë të tillë.
Hamiti, njëherësh edhe profesor universitar, ka përkujtuar se asnjë parti nuk duhet të zhvillojë veprimtari politike në mjediset e Universitetit të Prishtinës.
Gazeta Insajderi në prill të këtij viti kishte raportuar për një veprim të njëjtë nga VV’ja.
Vetëvendosje e kishte mbajtur mbledhjen e Këshillit të Përgjithshëm në ambiente të Universitetit të Prishtinës. Më saktësisht, në Administratën Qendrore të UP’së, e cila është e destinuar kryesisht për aktivitete të universitetit publik të Prishtinës.
Njësoj sikurse tash, aty shiheshin edhe logo të partisë. /Insajderi.org/
