E ftuar në emisionin “Politiko” në Kanal 10, Haxhiu tha se problemet e brendshme partiake nuk duhet të bëhen shkak që Kosova të shkojë në zgjedhje.

“Nuk guxon në asnjë mënyrë që problemet partiake ta dërgojnë vendin në zgjedhje. Për shkak të hakmarrjeve të mundshme apo çkado qoftë, nuk mendoj se duhet të ketë arsye të mos ketë unifikim për çështjen e presidentit”, deklaroi Haxhiu.

Ajo tha se nuk ka dëgjuar asnjërin prej gjashtë deputetëve të LDK-së të shprehet kundër figurës së Bekim Sejdiut.

“Asnjërin prej këtyre deputetëve nuk e dëgjova të thotë se nuk është Bekim Sejdiu. Pra, edhe Abdixhiku thotë se kushdo qoftë që do të ishte propozuar, rezultatin e njëjtë do ta kishim”, tha Haxhiu.

Sipas saj, deputetët kanë obligim kushtetues të marrin pjesë në procesin e zgjedhjes së presidentit dhe të votojnë pro ose kundër kandidatit.

“E kanë obligim kushtetues deputetët. Obligohen të jenë aty dhe të votojnë pro ose kundër. Sepse bojkotimi kundër presidentit është papërgjegjësi”, u shpreh ajo.

Haxhiu e cilësoi si “qasje të papërgjegjshme” çdo përpjekje për bojkotimin e procesit të zgjedhjes së presidentit, duke theksuar se kjo çështje duhet të trajtohet përtej interesave dhe përplasjeve partiake.