Kryetarja e Kuvendit të Kosovës, Albulena Haxhiu, ka mirëpritur zyrtarisht vendimin e Gjykatës Themelore në Prishtinë për dënimet kapitale ndaj pjesëtarëve të grupit terrorist që sulmuan Banjskën më 24 shtator të vitit të kaluar.
Gjatë seancës plenare, ajo vlerësoi punën e institucioneve të drejtësisë për shqiptimin e dënimeve me burgim të përjetshëm, por rikujtoi se rasti nuk mund të konsiderohet i mbyllur pa arrestimin e organizatorëve kryesorë.
Haxhiu potencoi se synimi final i drejtësisë mbetet transferimi i Milan Radoiçiqit dhe pjesëtarëve të tjerë të grupit në duart e autoriteteve kosovare.
“Përgëzoj institucionet e Republikës së Kosovës që terroristët i dënuan me burgim të përjetshëm. Megjithatë, drejtësia nuk përfundon këtu; ajo përmbyllet kur kryeterroristi Milan Radoiçiq transferohet në Kosovë së bashku me terroristët e tjerë”, deklaroi ajo.
Ajo bëri thirrje për respektimin e sakrificës së Policisë së Kosovës, duke kujtuar rreshterin që ra në krye të detyrës gjatë sulmit në veri.
“Lavdi heroit të Kosovës, rreshterit Afrim Bunjaku”, u shpreh Haxhiu para deputetëve të pranishëm.
