Një numër i vogël i qytetarëve, në katër komunat me shumicë serbe në veri të vendit, po paguajnë për energjinë elektrike që po e shpenzojnë. Ata thonë se po i pranojnë faturat e rrymës. Nga Zyra e Rregullatorit për Energji kanë njoftuar se ka pasur rënie të konsumit në veri krahasuar me vitet e kaluara.
Energjinë elektrike po e kursejnë, por shumica e qytetarëve në komunat veriore të Kosovës, nuk po paguajnë faturat për energjinë që po e shpenzojnë.
“Na i sjellin faturat. Ato ndryshojnë, nga njëherë janë të larta. Një herë më ka ardhur fatura 189 euro, pastaj e kanë korrigjuar pas ankesës. Ka qenë një konfuzion”, thotë qytetari i intervistuar.
Qytetari tjetër thekson se në fillim ka paguar. “Po po, në fillim i kam paguar, tani po presim të shohim çka do të na thonë”, tha ai.
“Më herët kam paguar diku deri 10-15 euro sepse jetoj vetëm”, thekson ai. Kurse tjetri thekson se e ka pranuar faturën, por nuk e paguan rrymën.
Nga Zyra e Rregullatorit për Energji kanë bërë të ditur për RTK-në se, sipas të dhënave të raportuara nga Elektrosever, nga shkurti deri në nëntor të vitit të kaluar qytetarët në veri janë faturuar mbi 11 milionë euro energji elektrike.
Nga kjo shumë ata janë inkasuar mbi 2 milionë euro.
Ndërsa shprehur në kWh, gjatë kësaj periudhe është shpenzuar energji mbi 158 milionë kWh.
Të dhënat e raportuara nga Elektrosever për periudhën shkurt-nëntor 2024:
Numri i konsumatorëve: 24.215
Faturimi i energjisë elektrike: 158,048,976 kWh
Vlera e faturuar: 11.627.943 euro
Inkasimi i energjisë së faturuar: 2.272.164 euro
ZRRE-ja gjithashtu ka bërë të ditur se në pjesën veriore ka pasur rënie të konsumit, krahasuar me vitet paraprake. Qytetarët e katër komunave me shumicë serbe kanë filluar të pranojnë fatura nga fundi i shkurti të vitit të kaluar, kur morën faturën e parë paushall. Ndërsa pas prillit atyre u është përllogaritur konsumi. Numri i konsumatorëve të energjisë në pjesën veriore është 24.215.
