Në pothuajse çdo seancë, kryetari i Kuvendit, Glauk Konjufca pyet se a mund të mbahet seanca apo të votohet ndonjë ligj. Kjo për shkak të mungesës së kuorumit.
Si pasojë e kësaj, pika të shumta të rendit të ditës janë shtyrë vazhdimisht, duke mos arritur të votohen projektligjet.
Prej kohësh në Kuvend nuk po arrijnë të kalojnë as marrëveshjet ndërkombëtare, pasi nuk po arrijnë të bëhen votat e mjaftueshme për t’i kaluar ato.
E, për shkak të mosvotimit të këtyre marrëveshjeve nga partitë opozitare PDK e AAK, kryeministri Kurti vendosi të mos iu përgjigje deputetëve në pyetjet e tyre parlamentare, në seancën e javës që po lëmë pas.
Por, Lëvizja Vetëvendosje nuk mori pjesë fare në seancën kur opozita kishte kërkuar të diskutohej për një rezolutë për plotësimin e kushteve për Policinë e Kosovës.
VV tha se nuk diskutojnë për këtë çështje, përderisa opozita nuk i voton marrëveshjet ndërkombëtare.
Mirëpo, kushtëzime të tilla nuk i bëjnë mirë aspak legjislativit.
Hulumtuesi nga Instituti i Kosovës për Demokraci (KDI), Arbër Thaçi, thotë për Gazeta Blic se është për kritika mungesa e bashkëpunimit mazhorancë dhe opozitë.
Sipas tij, nuk duhet të ndiqet praktika kushtëzuese, por që kritikon dhe opozitën për mos votim të marrëveshjeve ndërkombëtare.
“Mungesa e bashkëpunimit ndërmjet pushtetit dhe opozitës, në kuadër të punës në Parlament meriton kritika, pa dalluar asnjërën palë. Në kuptim të qasjes, praktika kushtëzuese nuk do të duhej të ndiqej, porse edhe qasja e opozitës në lidhje me votimin e marrëveshjeve ndërkombëtare, më saktësisht mosvotimi i tyre, në rrethana kur nuk kanë ofruar një shpjegim ideologjik për veprimin, paraqet një papërgjegjësi kundrejt funksionit që ata bartin”, vlerëson ai.
Se sa ndikon kjo në përkeqësimin e punës së Kuvendit, Thaçi potencon se nuk mund të përkeqësohet më shumë pasi Kuvendi është adaptuar me një ritëm shumë të ngadaltë dhe jo efektiv të punës.
“Nga pikëpamja se si mund të ndikojë punën e Kuvendit, në vlerësimin tim, edhe kjo situatë nuk mund të përkeqësojë punën e Kuvendit, meqë tanimë ky institucion është adaptuar me një ritëm shumë të ngadaltë dhe jo efektiv të punës”, deklaron Arbër Thaçi nga KDI./Gazeta Blic/
