Kryetari aktual i Partisë Demokratike të Unitetit (PDU), Kreshnik Husaj, ka bërë të ditur se i ka ofruar zyrtarisht Ramiz Lladrovcit mundësinë për të marrë drejtimin e kësaj partie politike.
Në një postim publik, Husaj e ka quajtur Lladrovcin “kryetar kampion i qeverisjes lokale” dhe ka bërë thirrje që ai dhe anëtarët e tij t’i bashkohen PDU-së.
“Partia Demokratike e Unitetit – PDU fton Ramiz Lladrovcin si kryetar kampion i qeverisjes lokale që edhe zyrtarisht të bëhet kryetar i PDU-së,” ka shkruar Husaj.
Ai theksoi se partia është e regjistruar në Komisionin Qendror të Zgjedhjeve (KQZ) dhe se ky hap është në përputhje me statutin e partisë.
“Si kryetar aktual i PDU-së, unë, Kreshnik Husaj, informoj opinionin publik se i kam ofruar PDU-në zotëri Lladrovcit si parti politike që të udhëhiqet nga ai. PDU-ja dhe anëtarësia e saj vlerëson njerëzit me vlera,” thuhet më tej në deklaratë.
