Komisioni Qendror i Zgjedhjeve pritet që gjatë ditës së sotme, e mërkurë, të përmbyllë numërimin e të gjitha fletëvotimeve që i takojnë zgjedhjeve të parakohshme për Kuvendin e Kosovës.
Gjatë ditës së sotme, pritet të numërohen 8 kutitë e mbetura, në të cilat janë sistemuar fletëvotimet nga votimi me postë jashtë Kosovës dhe fletëvotimet nga votimi me kusht dhe i personave me nevoja të veçanta.
Lajmi është bërë i ditur nga Zëdhënësi i KQZ-së, Valmir Elezi.
“Gjatë ditës së sotme, më konkretisht në ditën e 10 pas ditës së zgjedhjeve, KQZ do të përmbyllë aktivitetet paszgjedhore, të cilat, KQZ i zhvillon për të ardhur deri tek rezultatet përfundimtare të zgjedhjeve. Në Qendrën e Numërimit dhe Rezultatateve do të numërohet pjesa e mbetur e fletëvotimeve nga votimi jashtë Kosovës dhe fletëvotimet nga votimi me kusht dhe i personave me nevoja të veçanta”.
Ndërkaq, KQZ mëngjesin e së mërkurës ka përditësuar të dhënat nga procesi i numërimit në QNR. Sipas këtyre të dhënave, nga 223 kuti votimi në të cilat janë sistemuar fletëvotimet nga votimi me postë janë numëruar 215 dhe 8 të tjera do të numërohen gjatë ditës.
Njëkohësisht, KQZ ka filluar me numërimin e fletëvotimeve nga votimi me kusht, i cili është mundësuar në 52 vendvotime me kusht, ku janë evidentuar 8,751 votues. Po ashtu, ka filluar edhe numërimi i fletëvotimeve nga votimi i personave me nevoja të veçanta, i realizuar jashtë vendvotimeve, ku për këtë lloj votimi kanë qenë të regjistruar 3,144 votues.
Sipas rezultateve të përmbledhura të publikuara nga Komisioni Qendror i Zgjedhjeve (KQZ), me 96.71 për qind të vendvotimeve të numëruara (2,763 nga 2,857), Lëvizja Vetëvendosje vazhdon të prijë bindshëm në zgjedhjet parlamentare.
Sipas të dhënave të publikuara më 17 qershor 2026 në orën 09:41, me 96.71 për qind të vendvotimeve të numëruara (2,763 nga 2,857), Vetëvendosje ka siguruar 47.08 për qind të votave, që përkthehet në 376,226 vota dhe 53 ulëse në Kuvend.
Partia Demokratike e Kosovës renditet e dyta me 19.49 për qind të votave dhe 22 ulëse, ndërsa Lidhja Demokratike e Kosovës mban vendin e tretë me 16.74 për qind dhe 18 ulëse.
AAK ka marrë 6.73 për qind të votave dhe 7 ulëse, ndërsa Lista Serbe ka siguruar 5.38 për qind dhe 9 ulëse. KDTP ka fituar 0.71 për qind të votave dhe 2 ulëse.
Rezultatet mbeten preliminare deri në përfundimin e numërimit dhe certifikimin zyrtar nga KQZ-ja.
Sipas të dhënave të publikuara më 17 qershor 2026 në orën 09:41, rezultatet janë si më poshtë:
