Për muaj të tërë Kuvendi u mbajt i bllokuar. Dhjetë marrëveshje ndërkombëtare pritnin të votoheshin, teksa pozita nuk mund t’i kalonte ato e vetme pa mbështetje. E këtë mbështetje nuk e gjeti tek opozita. Këta të fundit votimin e kushtëzonin me dorëheqjen e qeverisë për shkak të keqqeverisjes. Por, konsensusi u arrit pas një darke në një nga hotelet në Prishtinë, në mes të kryeministrit Albin Kurti dhe kryetarit të Partisë Demokratike të Kosovës, Memli Krasniqi. Takimi ishte i frytshëm dhe marrëveshjet kaluan. Por, Kodi Civil një ligj poashtu mjaft i rëndësishëm ende mbeti jashtë rendit të ditës në Kuvend. Një pjesë e deputetëve të Kuvendit, përfshirë edhe ata të VV-së janë kundër tij. Për votimin e këtij Kodi duhen 2/3 e votave.
“Kosova do të synojë që së shpejti të bëhet vendi i dytë në Ballkanin Perëndimor, pas fqinjëve tanë Mali i Zi, duke u ofruar qytetarëve të saj të drejtën e bashkimeve civile të të njëjtës gjini. Ne do të punojmë shumë për ta kaluar këtë në të ardhmen shumë të afërt. Për këtë unë personalisht do të ndërtoj një shumicë parlamentare – dhe do të bëj thirrje për mbështetje të gjerë për këtë edhe nga partitë opozitare. Vendimi për mbledhjen e qeverisë për këtë çështje tashmë është marrë” – kishte premtuar kryeministri Kurt gjatë një vizite në Berlin.
Por, ky zotim i muajit të kaluar ende nuk është realizuar edhe pse në Kuvend pati një disponim pozitiv sidomos javën e kaluar kur kaluan dhjetë marrëveshjet ndërkombëtare u votuan, pas muajsh të tërë ngecje. Në votimin e tyre morën pjesë kryesisht deputetët e PDK-së e në disa tjera edhe ata të LDK-së e AAK-së, ndonëse më parë ata kushtëzonin votën me dorëheqjen e Qeverisë për shkak të keqqeverisjes.
Gjithçka ndryshoi pas takimit të kryetarit të Partisë Demokratike të Kosovës, Memli Krasniqi me kryeministrin Albin Kurti. Sipas Krasniqit, në takim insistuan për shpërndarjen e Kuvendit dhe për caktimin e zgjedhjeve të reja.
“Kryeministrit Kurti ia shpreha këtë qëndrim pa ekuivokë ashtu siç kemi shprehur publikisht tash e sa kohë. Jemi të gatshëm të gjejmë një darkordim për një datë të re të zgjedhjeve për të shpërndarë kuvendin përmes një mocioni të përbashkët. Unë kam punuar për këtë çështje, pa dashur të marrë flamurin e protagonistit.”, pati thënë Krasniqi.
E lidhur me votimin e marrëveshje ndërkombëtare, Krasniqi ka thënë se është vendim i pavarur nga takimi me Kurtin.
Në Kuvendin e Kosovës pas disa muajsh pritjesh u miratua Projektligji për Aderimin e Kosovës në Konventën për Importin e Përkohshëm; Ligji për ratifikimin e Marrëveshjes ndërkombëtare ndërmjet Kosovës nga njëra anë dhe Bashkimit Evropian nga ana tjetër për pjesëmarrjen e Kosovës në Programin e bashkimit programi i tregut të vetëm; Ligji për Ratifikimin e Marrëveshjes së Financimit ndërmjet Kosovës, e përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim për projektin “Projekti për forcimin e qeverisjes digjitale për ofrimin e shërbimeve”; Ligji për ratifikimin e Marrëveshjes për sigurime sociale ndërmjet Kosovës dhe Mbretërisë së Holandës; Ligji për ratifikimin e Marrëveshjes ndërkombëtare ndërmjet Qeverisë së Kosovës, të përfaqësuar nga Ministria e Financave, Punës dhe Transfereve dhe Qeverisë së Konfederatës Zvicerane, të përfaqësuar nga Sekretariati shtetëror për çështje ekonomike për Projektin e “qëndrueshmërisë klimatike në sektorin e ujërave në Kosovë”.
Po ashtu, Kuvendi kaloi edhe Ligjin për ratifikimin e Marrëveshjes së financimit në mes të Kosovës, përfaqësuar nga Ministria e Financave, Punës dhe Transfereve, Korporata Energjetike e Kosovës (KEK), dhe KFË, Frankfurt Am Main, për Programin e energjisë solare I (solar4kosovo I) Fotovoltaik; Ligjin për ratifikimin e Marrëveshjes ndërkombëtare, për pjesëmarrjen e Kosovës në programin e Bashkimit Evropian “Evropa digjitale për periudhën 2021-2027” ndërmjet Republikës së Kosovës dhe Bashkimit Evropian; Ligjin për ratifikimin e Marrëveshjes ndërmjet Kosovës dhe Bashkimit Evropian mbi pjesëmarrjen e Kosovës në Programin e BE-së qytetarët, barazia, të drejtat dhe vlerat, dhe Ligjin për ratifikimin e “amendamentimit nr.3 të Marrëveshjes financiare ndërmjet Republikës së Kosovës dhe Bashkimit Evropian për programin IPA 2015”.
Ndërkaq në një seancë tjetër u miratua Traktati ndërmjet Kosovës dhe Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze, si dhe Marrëveshja e kredisë për programin e financave publike dhe rritjes ekonomike ndërmjet Kosovës dhe Fondit OPEC për Zhvillim Ndërkombëtar.
Marrëveshjet ndërkombëtare arrijnë vlerën e 300 milionë eurove, ka thënë më herët ministri i Financave, Punës dhe Transfereve, Hekuran Murati.
“Janë 300 milionë euro shumë totale në formë të marrëveshjeve ndërkombëtare që tash e disa muaj po presin ratifikimin në Kuvend. Së shpejti do të dërgojmë për ratifikim edhe marrëveshjen me Bankën Botërore në vlerë 90 milionë euro. Pra do të bëhen 390 milionë euro marrëveshje ndërkombëtare të cilat presin votën e deputetëve të Kuvendit”, pati shkruar Murati në Facebook.
Mbetet të shihet nëse në seancën e radhës pritet të votohet në seancën e radhës të Kuvendit të Kosovës.
Në Kodin Civil thuhet se “martesa është bashkësi e regjistruar ligjërisht ndërmjet dy bashkëshortëve të sekseve të ndryshme, me anë të së cilës ata lirshëm vendosin që të jetojnë së bashku si burrë e grua”, ndërsa në nenin tjetër të këtij Kodi theksohet se “bashkësitë e regjistruara civile ndërmjet personave me sekse të njëjta janë të lejuara” dhe se kushtet dhe procedura lidhur me këtë rregullohen me ligj të veçantë.
Këto nene nxitën kundërshtime të forta gjatë debatit në parlamentin e Kosovës.
Kundërshtime ka si nga radha e pozitës ashtu edhe nga disa deputetë të opozitës.
Kosova ka miratuar në vitin 2004 ligjin kundër diskriminimit dhe përfaqësues të shoqërisë civile dhe komunitetit LGBT thonë se kuadri ligjor ofron garanci për të drejtat tyre, por ky komunitet ende është i detyruar të jetojë në hije, me frikën se zbulimi i orientimit seksual do të mund të çojë në përjashtimin nga familja e shoqëria.
