Kryeministri Albin Kurti në mbledhjen e sotme të Qeverisë ka njoftuar se ka nënshkruar “një vendim të rëndësishëm” para se të fillonte mbledhjen për themelimin e Komisionin Ndërministror për qëllim të vlerësimit dhe nisjes së procedurave dhe negociatave lidhur me hapjen e fabrikës për prodhimin e municionit dhe për laborator mbi dizajnimin e fluturakeve pa pilot në Kosovë.
“Një vendim të rëndësishëm që porsa e nënshkrova para se të vij në mbledhje dhe me një hap të domosdoshëm besoj për të garantuar zhvillimin e qëndrueshëm të saj. Do të themelojmë Komisionin Ndërministror për qëllim të vlerësimit dhe nisjes së procedurave dhe negociatave lidhur me hapjen e fabrikës për prodhimin e municionit dhe për laborator mbi dizajnimin e fluturakeve pa pilot në Republikën e Kosovës…. Me këtë vendim sot hedhim hapat tonë të parë për ngritjen e industrisë ushtarake”.
Kurti tha se ky vendim vjen në të njëjtën ditë në Ditën e Forcës, në “ditën e ushtrisë të Kosovës”.
“Qeveria jonë ka treguar se mbrojtja ka qenë ndër prioritetet tona kryesore dhe kjo është dëshmuar në vazhdimësi si me numrin e ushtarëve që është dyfishuar si me buxhetin e mbrojtjes që është trefishuar si me trajnimet e oficerëve dhe ushtarakëve jashtë vendit që është katërfishuar, is me investime në armatim që janë shumëfishuar”.
