Kurti premtoi prokurori të specializuar kundër korrupsionit, Miftaraj: Ide e varfër, veç për qëllime elektorale
Kryeministri i Kosovës, Albin Kurti, ka premtuar se nëse fiton sërish zgjedhjet, do ta krijojnë një prokurori të re të specializuar, për rastet e korrupsionit dhe krimit të organizuar.
Sipas Kurtit, vetëm në këtë mënyrë, Prokuroria do të ishte në nivel të detyrës me kërcënimet e korrupsionit dhe krimit të organizuar.
Megjithatë, juristët dhe përfaqësuesit e shoqërisë civile idenë e Kurtit po e shohin të varfër, për qëllime elektorale dhe propozim që nuk është i bazuar në dokumentet që janë në fuqi.
Drejtori i IKD-së, Ehat Miftaraj, ka thënë për Nacionalen se ideja e Kurtit nuk bazohet as në Strategjinë për Sundim të Ligjit të cilën e ka miratuar vetë Vetëvendosja.
“Brenda Prokurorisë Speciale të Republikës së Kosovës ekzistojne departamente për luftimin e krimit të organizuar dhe korrupsionit. Themelimi i mekanizmave të rinj brenda brenda kontrollit dhe administrimit të Këshillit Prokurorial të Kosovës mund të ndodhin. Por do të ishte utopike të që ky menakizëm apo strukturë e rë të sjell rezultate kjo prokurori që kontrollohet nga ky Këshill Prokurorial. Në anën tjetër, premtime të tilla nga LVV qartazi shihen se janë vetëm për efekt elektoral. Një ide si kjo është shumë e varfër duke mos u bazuar as në Strategjinë për Sundimin e Ligjit e miratuar nga vet qeveria e udhëhequr nga LVV”, tha fillimisht Miftaraj.
Ai më tutje tha, se pushteti nuk ka pasur kapacitet ta finalizojë Strategjinë kundër Korrupsionit, e që sipas tij, tregon se nuk do të mund ta themelojnë një prokurori të re.
“Në anën tjetër, nëse marrrim për bazë faktin se LVV për katër vite nuk ka ditur dhe nuk ka mundur të miratoj një Strategji kundër Korrupsion e cila miratohet në Qeveri dhe nuk kalon fare në Kuvendin e Kosovës, është pak e besueshme se të njejtit kanë kapacitete apo njohuri të finalizojnë një prokurori të re, e cila e përsëris nuk është e bazuar në dokumentet strategjike në fuqi”, ka thënë Miftaraj për Nacionalen.
Kryeministri aktual e kandidati i VV-së për këtë pozitë, propozoi edhe krijimin e një zyre disiplinore, e cila do të shqyrtonte ankesat ndaj gjyqtarëve e prokurorëve.
Për Miftarajn, këto propozime janë të stërvjetëruar dhe të destinuara për të dështuar ende pa filluar.
“Sa i përket zyrës disiplinore, Kryeministri Kurti po propozon dicka që është dëshmuar se kanë qenë e dështuar në Kosovë për më shumë se 10 vite. Kosova ka pasur Zyre të Prokurorit Disiplinor, i cili mekanizëm është shfuqizuar në vitin 2018 duke krijuar mekanizëm krejtësishtë të ri. Edhek ky propozim është në kundërshtim me dokumentet strategjike për sundimin e ligjit në fuqi të miratuara nga vet qeveria Kurti. Kështu që propozime të tilla janë të stërvjetruara dhe të destinuara për të dështuar ende pa filluar”, ka thënë Miftaraj për Nacionalen.
Premtimet e Kurtit
“Prokurori të re të specializuar për të luftuar krimin dhe korrupsionin sipas modeleve të vendeve që e kanë kryer me sukses këtë betejë”, premtoi kandidati për kryeministër i Vetëvendosjes, Albin Kurti, në një videoadresim zgjedhor.
Këtë ai e arsyetoi si “të rëndësishme” që institucioni hetues, sipas tij, “të jetë në nivelin e deytrës” në raport me rrjetet kriminale “që janë në vijimësi kundër shtetit dhe të drejtës në tërësi”.
“Do të themelojmë Prokurori të re të specializuar për çështje të krimit të organizuar dhe korrupsionit me përkrahje dhe model të vendeve që e kanë kryer me sukses këtë betejë në Evropë”, tha Albin Kurti,
“Nuk ka asgjë më të rëndësishme në drejtësi se sa institucioni i hetimit të jetë në nivelin e detyrës në raport me rrjetet kriminale që janë në vijimësi të organizuara kundër shtetit dhe të drejtës në tërësi”.
Në kontekstin e kësaj prokurorie “të re” të specializuar, Kurti u zotua për themelimin edhe të një “zyreje disciplinore” për llogaridhënie të Këshillit Gjyqësor dhe Këshillit Prokurorial – për të trajtuar ankesat ndaj gjyqtarëve dhe prokurorë.ve
“Zyra për hetime disciplinore do të jetë një strukturë e re që garanton balancë dhe kontroll nëpërmjet pushteteve duke rritur llogaridhënien e Këshillit Gjyqësor të Kosovës dhe Këshillit Prokuroria për veprimet etyre”, tha ai.
“Zyra do të trajtojë ankesat dhe sjelljet e papërshtatshme nga gjyqtarët dhe prokurorët. Procesi disiplinor do të mund të inicohet edhe ex-officio. Zyra do të kryejë mbledhjen e provave dhe paraqitjen e çështjeve para komisioneve disiplinore të KGJK-së dhe KPP-së”, shtoi Kurti.
Në kuadër të zotimeve ai tha se “cep më cep do të ketë rend dhe ligj”.
Duke folur për mbrojtje dhe ushtri, Albin Kurti u zotua që buxheti për Forcën e Sigurisë së Kosovës do të jetë mbi 1 miliardë në katër vite dhe se do të funksionalizohet fabrika për prodhimin e municioneve.
Po ashtu, u zotua ai, “gjatë këtij mandati do të zhvillojmë dronë të ri ‘Made in Kosova’”.
