Kryeministri në detyrë, Albin Kurti ka thënë se kreu i Lidhjes Demokratike të Kosovës, Lumir Abdixhiku e njoftoi në takimin e sotëm për situatën aktuale në këtë parti, ku gjashtë deputetë kanë dalur kundër kandidatit për president, Bekim Sejdiu, nga marrëveshja me Lëvizjen Vetëvendosje.
Kurti para mediave ka folur për takimin që e pati sot me Abdixhikun:
“Marrëveshjen politike që kemi bërë me LDK-në për presidentin, për të cilin jemi dakorduar, dhe ata ndajnë keqardhjen me të gjithë neve që kjo nuk po mund të realizohet pasi 6 deputetë të LDK-së nuk po e respektojnë këtë marrëveshje.
Këtu ishim gjithsej 10 veta, 5 jemi në qeveri e 5 në Kuvend…unë i falenderova për kontributin që japin, angazhimin që bëjnë.
Do të përpjekemi që t’i evitojmë zgjedhjet e reja tash që kemi marrëveshje, dje pasdite ndodhi një zhvillim negativ por kemi pasur progres dhe në këtë legjislaturë jemi më mirë se në të kaluarën sa i përket numrit të votave për president.
Nga Abdixhiku jam informuar për situatën aktuale në subjektin e tij, e njoftova edhe unë për diskutimet me grupin parlamentar të VV-së, na duhet një mbledhje e re për të parë mundësitë që të ecim përpara”.
Tutje, Kurti ka thënë se propozimi vazhdon të jetë Bekim Sejdiu, derisa shtoi “shyqyr që negociatat rezultuan me marrëveshje”.
“Propozimi është Bekim Sejdiu, jemi marrë vesh, negociatat kanë rezultuar shyqyr me marrëveshje. Ta shohim tash se çfarë mund të bëjmë më tutje”, tha ai.
