Kryeministri i Kosovës, Albin Kurti, është takuar në Shën Stefan me Nënsekretarin Parlamentar të Shtetit për Evropën në Ministrinë e Jashtme britanike, Lord Wood of Anfield, ku ka vlerësuar marrëdhëniet e ngushta dhe bashkëpunimin me Mbretërinë e Bashkuar.
Përmes një postimi në rrjetet sociale, Kurti ka bërë të ditur se takimi vjen pas bisedave të zhvilluara gjatë dy muajve të fundit me të Dërguarën e Posaçme britanike për Ballkanin Perëndimor, Dame Karen Pierce, si në Asamblenë e Përgjithshme të OKB-së në Nju Jork, ashtu edhe përmes telefonit.
Kreu i Qeverisë ka theksuar rolin e rëndësishëm të Mbretërisë së Bashkuar në mbështetjen e shtetësisë së Kosovës, duke e cilësuar atë si një mike dhe aleate kyçe në rrugëtimin e vendit.
“Mbretëria e Bashkuar ka qenë mike dhe aleate kyçe në çdo etapë të zhvillimit tonë, nga çlirimi dhe pavarësia deri te demokracia e sotme, dhe mbetet ndër zërat më të fuqishëm për integrimin tonë euroatlantik”, ka shkruar Kurti.
Ai ka shtuar se, me konsolidimin dhe funksionimin e plotë të institucioneve, fokusi kryesor është te reformat dhe zhvillimi ekonomik.
Në këtë drejtim, Kurti ka përmendur zgjerimin e bashkëpunimit me Britaninë e Madhe në disa fusha, përfshirë mbrojtjen dhe organizimin e Lojërave Mesdhetare “Prishtina 2030”.
