Deputetja e Partisë Demokratike të Kosovës (PDK), Sala Jashari, ka protokolluar kërkesën për interpelancë ndaj ministrit të Shëndetësisë, Arben Vitia, pas raportimeve lidhur me vdekjen e një pacienteje me kancer.
Kërkesa synon që rasti të trajtohet në Kuvend, ndërsa procedurat parlamentare përcaktojnë hapat që duhet të ndiqen deri në caktimin e datës së seancës.
Sipas procedurës parlamentare, kërkesa e dorëzuar te kryetarja e Kuvendit do t’i përcillet më tej Ministrisë dhe Qeverisë, për t’u kthyer më pas në Kuvend, ku Kryesia do të vendosë për datën e mbajtjes së seancës.
Sipas Rregullores së Kuvendit, mocioni për interpelancë i dorëzohet kryetarit të Kuvendit. Më tej, rregullorja përcakton se kryetari, brenda dy ditësh nga pranimi i kërkesës për interpelancë, ia përcjell atë kryeministrit. Ky i fundit është i obliguar ta shqyrtojë mocionin dhe t’i përgjigjet Kuvendit brenda shtatë ditësh.
Në Rregulloren e Kuvendit përcaktohet edhe mënyra e trajtimit të interpelancës në seancë plenare:
“Interpelanca vihet në rendin e ditës të seancës plenare në afat prej shtatë (7) ditësh, pasi të merret përgjigjja nga Qeveria. Nëse Qeveria, brenda afatit të paraparë në paragrafin 5 të këtij neni, nuk e dërgon përgjigjen për interpelancën, ajo vihet si pikë e fundit e rendit të ditës së seancës plenare që është në zhvillim. Nëse Kuvendi nuk është duke mbajtur seancë, ajo vihet si pikë e parë e rendit të ditës të seancës së radhës. Kuvendi nuk mund ta refuzojë vënien e interpelancës në rendin e ditës, përveç në rast se ajo nuk i plotëson kushtet formale sipas paragrafit 4 të këtij neni”, thuhet në Rregulloren e Kuvendit.
