Prokuroria Themelore në Prishtinë ka bërë të ditur se ka ndaluar tre persona në lidhje me aksidentin tragjik që ndodhi dje në vendpunishten e kompanisë “Vllezërit Asllani” në Prishtinë, ku humbi jetën një punëtor, ndërsa një tjetër mbeti i lënduar rëndë.
“Me urdhër të Prokurorit të Shtetit janë ndaluar tre persona. Me inicialet A.Sh., nën dyshimin e kryerjes së veprës penale ‘Shkaktimi i rrezikut të përgjithshëm’, si dhe B.S., në cilësinë e personit përgjegjës të kompanisë ndërtuese, dhe E.E., në cilësinë e personit të kompanisë investuese të projektit, nën dyshimin e kryerjes së veprës penale ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’”, thuhet në njoftimin e prokurorisë.
Burime të Veriu.info bëjnë të ditur se personi i ndaluar me inicialet E.E. është Egzon Elshani – drejtor në kompaninë “Vllezerit Asllani” Sh.P.K. të biznesmenit Qazim Asllanaj.
Veriu.info ka gjetur se në ARBK drejtor menaxhues i kompanisë “Vllezerit Asllani” Sh.P.K. është Qazim Asllanaj, por i njëjti nuk është ndaluar nga policia, përkundër detyrave menaxhuese që ka në kompani.
Ndryshe, dje në objektin e kompanisë “Vëllezërit Asllani” në Prishtinë, ishte rrëzuar vinçi, ku për pasojë ka vdekur punëtori Ermal Sherifi-20-vjeç.
