Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin laboratori “Alfa Lab” Sh.P.K. me themelues Leutrim Haziri në Prishtinë është gjobitur me 1 mijë euro për shkelje të dispozitave të Ligjit për Shëndetësi.
Në arsyetimin e vendimit të Inspektoratit Shëndetësor me të cilin është gjobitur laboratori biokimik hematologjik “Alfa Lab”, thuhet se inspektimi është realizuar pas një ankese të një qytetari që pretendonte se ky laborator po ofronte shërbime shëndetësore të palicencuara.
“Duke u bazuar në të gjeturat gjatë inspektimit, u konstatua se në këtë institucion ofroheshin shërbime shëndetësore të cilat nuk figuronin të lajmëruara në DLA-MSH (teste rapide mikrobiologjike). Në këtë institucion ofroheshin shërbime shëndetësore biokimike të cilat në DLA-MSH figurojnë vetëm të procesuara që nga viti 2022. Gjatë inspektimit u gjet një rezultat i analizave biokimike i lëshuar pa prezencë të specialistes së Biokimisë Klinike”, thuhet në arsyetim.
Tutje, inspektorët shëndetësorë kanë konstatuar se teknik-laboranti Dion Hasani nuk figuronte i lajmëruar dhe regjistruar në Divizionin për Licencim dhe Akreditim të Ministrisë së Shëndetësisë, që faktikisht i bie se ka punuar ilegalisht.
Pra, inspektorët shëndetësorë kanë gjetur se në “Alfa Lab” ofroheshin shërbime shëndetësore të palicencuara dhe një profesionst shëndetësor punonte pa licencë, gjë që të dyja gjetjet përbëjnë shkelje ligjore, sepse veprimtarinë e ka ushtruar pa përmbushur kushtet ligjore.
Çka thotë “Alfa Lab”?
Veriu.info e ka marrë edhe qëndrimin e laboratorit “Alfa Lab” për gjobën e shqiptuar nga Inspektorati Shëndetësor, të cilët bëjnë të ditur se gjobën e kanë paguar, por që konsiderojnë se vendimi nuk pasqyron plotësisht rrethanat faktike të rastit.
“Konsiderojmë se vendimi nuk pasqyron plotësisht rrethanat faktike të rastit dhe, për këtë arsye, çështja është duke u trajtuar përmes mjeteve juridike pranë organeve kompetente. Përderisa procedura është në zhvillim, nuk do të ishte e përshtatshme të komentonim më tej aspektet juridike të saj. Edhe pse gjoba është paguar, ne nuk pajtohemi me bazueshmërinë e këtij vendimi dhe e kemi kundërshtuar atë përmes padisë së paraqitur në gjykatën kompetente ndaj Ministrisë së Shëndetësisë, ku çështja aktualisht është në procedurë gjyqësore. Lidhur me rapid testet mikrobiologjike, dëshirojmë të sqarojmë se Alfa Lab ushtron veprimtarinë edhe përmes laboratorit të mikrobiologjisë, i cili është i regjistruar dhe funksionon si subjekt i veçantë për ofrimin e shërbimeve mikrobiologjike. Për këtë arsye, konsiderojmë se është e rëndësishme që të merren parasysh të gjitha rrethanat dhe dokumentacioni përkatës gjatë vlerësimit të këtij rasti”, thuhet në përgjigjen e “Alfa Lab” për Veriu.info.
Tutje, ky laborator mohon faktin se analizat biokimike të jenë lëshuar pa mbikëqyrjen dhe vendimin profesional të specialistit të biokimisë, por që vendimi i inspektorëve shëndetësorë e thotë të kundërtën.
Kush është “Alfa Lab” Sh.P.K.?
Laboratori “Alfa Lab” është kompani e themeluar në vitin 2022 në Prishtinë nga Leutrim Haziri, i cili zotëron 100% të aksioneve.
Aktivitet kryesor biznesor i “Alfa Lab” Sh.P.K. në ARBK shkruan se janë aktivitetet e tjera të shëndetit të njeriut, ndërsa si aktivitet sekondar ka të regjistruar aktivitetet e mjekësisë së specializuar.
LEXONI EDHE:
