Veprimtaria e shumë prej institucioneve private shëndetësore në Kosovë është kthyer në sfidë për shtetin, pasi që ato po operojnë vazhdimisht në mënyrë të kundërligjshme me shërbime të palicencuara dhe staf ilegal (të palicencuar), gjë që paraqet edhe rrezik për shëndetin dhe jetën e pacientëve.
Veriu.info ka siguruar një vendim të Inspektoratit Shëndetësor të Ministrisë së Shëndetësisë, me të cilin laboratori dhe poliklinika “VitaLab” në Podujevë është gjobitur me 3 mijë euro për shkelje të dispozitave të Ligjit për Shëndetësi, pasi që ka ofruar shërbime të palajmëruara (palicencuara) dhe ka punuar me staf të palajmëruar (palicencuar) në Divizionin për Licencim dhe Akreditim të Ministrisë së Shëndetësisë (DLA/MSh).
Në arsyetimin e vendimit të siguruar nga Veriu.info që mban datën 23 shkurt 2026, thuhet se Inspektorati Shëndetësor ka realizuar inspektim më 28 janar në poliklinikën dhe laboratorin “VitaLab” në Podujevë, ku ka gjetur se teknike-laborantja mjekësore Arijana Sinani nuk ishte e lajmëruar e as licencuar në DLA/MSh.
“Gjithashtu u pa se në njërën pjesë të laboratorit ofroheshin shërbimet e mikrobiologjisë (shërbim i lëshuar në DLA më 07.05.2024) ku gjetëm mostra, teste të shpejta mikrobiologjike (rapide) dhe rezultate të lëshuara me faksimil të Dr. Arsim Kurti – Specialist i Mikrobiologjisë (ku nuk është i lajmëruar në DLA). Gjithashtu u gjetën teste të HIV dhe Grupit të Gjakut, shërbime këto të palajmëruara/palicencuara në DLA/MSh”, thuhet në vendimin e Inspektoratit Shëndetësor me të cilin është gjobitur laboratori dhe poliklinika “VitaLab” me pronar Lavdim Zhdrellën.
Në fund të vendimit, Inspektorati Shëndetësor konstaton që “Vitalab” nuk e ka respektuar Ligjin për Shëndetësi, duke mos lajmëruar shërbime që ofron, si dhe personelin shëndetësor.
Çka thotë “VitaLab”?
Në një përgjigje kontraverse për Veriu.info, “Vitalab” thotë se disa nga konstatimet e Inspektoratit Shëndetësor nuk pasqyrojnë gjendjen faktike, por kanë paguar gjobën dhe nuk kanë ushtruar ankesë, gjë që është kontradiktë në vetvete.
Sikurse edhe disa institucione tjera private tek të cilat është zbuluar staf i palicencuar, edhe “Vitalab” jep ‘arsyetim’ të njëjtë, duke thënë se profesionistja shëndetësore ka qenë në muajin e parë të punës.
“Arijana Sinani është laborante e licencuar. Gjatë inspektimit ajo ishte në muajin e parë të punës dhe ende nuk ishte regjistruar në DLA. Megjithatë, ajo nuk ka punuar e vetme, pasi në laborator ishte e pranishme edhe laborantja tjetër e licencuar dhe e regjistruar në DLA, siç konstatohet edhe në procesverbalin e inspektimit”, thuhet në përgjigjen e “Vitalab” për Veriu.info.
Për shkelje tjetër ligjore të lëshimit të analizave mikrobiologjike pa licencë, “Vitalab” pretendon se në pikën e tyre në Podujevë nuk janë kryer analiza mikrobiologjike.
“Aty është bërë vetëm pranimi i mostrave, ndërsa analizat janë kryer në laboratorin tonë të licencuar në Prishtinë. Në pikën tonë në Podujevë nuk është lëshuar asnjë rezultat me vulën apo nënshkrimin e Dr. Arsim Kurtit. Të gjitha rezultatet janë lëshuar nga laboratori qendror në Prishtinë, sipas procedurave tona të punës”, kanë deklaruar nga “Vitalab”, edhe pse në vendimin e Inspektoratit Shëndetësor thuhet se janë gjetur faksimile të lëshuara pikërisht nga Dr. Arsim Kurti.
“Në pikën tonë në Podujevë nuk janë kryer analiza laboratorike për HIV. Gjatë inspektimit nuk është gjetur asnjë rezultat që dëshmon kryerjen e analizave për HIV. Janë konstatuar vetëm disa teste të shpejta për HIV të mbetura nga një periudhë e mëparshme, të cilat nuk kanë qenë në përdorim dhe nuk përbëjnë dëshmi se ky shërbim është ofruar”, thuhet në përfundim të përgjigjes së “Vitalab” në pyetjet e dërguara nga Veriu.info.
Kush është “Vitalab”?
Poliklinika dhe Laboratori “Vitalab” është kompani e themeluar 2016 në Prishtinë, ku 100% të aksioneve i zotëron Lavdim Zhdresa
“Vitalab” në Podujevë është hapur me një ceremoni solemne në vitin 2022, ku kishte marrë pjesë edhe kryetari i komunës, Shpëjtim Bulliqi.
Mirëpo, “Vitalab” në ARBK nuk e ka të regjistruar njësinë biznesore të hapur në Podujevë, gjë që duket nuk iu ka rënë në ‘sy’ inspektorëve.
