Kohëve të fundit, kosovarët po përballen gjithnjë e më shpesh me forma të sofistikuara të mashtrimit përmes SMS, ku mashtruesit, duke keqpërdorur emrat dhe identitetin e bankave komerciale në vend, dërgojnë mesazhe të rreme me kërkesa për “përditësim të të dhënave” përmes linqeve të dyshimta.
Kësisoj, po sigurohet vjedhja e të dhënave personale dhe bankare të viktimave, duke u mundësuar të dyshuarve qasje të paautorizuar në llogaritë dhe mjetet financiare të tyre.
Kjo dukuri ka shkaktuar pasoja të konsiderueshme për shumë qytetarë, të cilët kanë raportuar edhe në organet e rendit se kanë rënë pre e këtyre.
KlanKosova.tv ka kontaktuar Policinë e Kosovës, të cilët thanë se gjatë periudhës së fundit janë raportuar dhe trajtuar disa raste të tilla, ku qytetarët janë dëmtuar përmes tërheqjes së paautorizuar të parave nga xhirollogaritë e tyre.
“Gjatë periudhës së fundit në kuadër te Drejtorive Rajonale te Policisë janë raportuar dhe trajtuar, raste te mashtrimeve kur qytetarët janë dëmtuar përmes tërheqjes së paautorizuar të parave nga xhirollogaritë e tyre dhe kryerjen së pagesave pa dijeninë e tyre në banka të ndryshme”, thotë Policia e Kosovës në përgjigjen për KlanKosova.tv.
Në anën tjetër, eksperti i rrjeteve sociale, Valon Kerolli tha për KlanKosova.tv, se mashtruesit po targetojnë qytetarët që kanë më pak njohuri teknologjike sidomos të moshuarit.
“Në Kosovë po shihet që mashtruesit po targetojnë sidomos personat që nuk kanë njohuri të mjaftueshme për teknologji, veçanërisht të moshuarit. Mirëpo, sot askush nuk është plotësisht i sigurt, sepse mesazhet mashtruese po bëhen gjithnjë e me profesionale dhe po duken si mesazhe reale nga banka, posta apo institucione tjera. Mjafton një klikim ose dhënia e një kodi dhe qytetarët mund të humbin para apo të dhëna personale”, tha Kerolli për Klankosova.tv.
Policia e Kosovës i tha KlanKosova.tv se po vazhdon të monitorojë situatën e sigurisë së përgjithshme në hapësirat digjitale duke trajtuar çdo rast në përputhje me Kodin Penal.
“Policia e Kosovës monitoron në vazhdimësi situatën e sigurisë së përgjithshme, në këtë fushëveprim edhe në hapësirën digjitale trajton çdo rast, në përputhje me Kodin Penal dhe në bashkëpunim me organet e drejtësisë dhe Policia e Kosovës mbetet e përkushtuar në parandalimin dhe hetimin e këtyre aktiviteteve te kundërligjshme përfshirë edhe ato digjitale”.
Në anën tjetër, Kerolli potencoi se institucionet e sigurisë duhet të reagojnë shpejt dhe me koordinim.
Ai tha se duhet të lansohen fushata vetëdijësuese në media, rrjete sociale dhe përmes SMS-ve për të informuar qytetarët rreth rrezikut.
Kerolli po ashtu theksoi nevojën që numrat që mashtruesit përdorin për këtë veprimtari të identifikohen dhe të bllokohen nga operatorët telefonikë.
“Institucionet në Kosovë duhet të reagojnë më shpejt dhe me koordinim më të madh. Duhet të ketë fushata vetëdijësuese në media, në rrjete sociale dhe madje edhe përmes SMS-ve. Institucionet, Policia, bankat dhe operatorët telefonik duhet të bashkëpunojnë më shumë për bllokimin e numrave dhe linkeve mashtruese. Në disa shtete janë vendosur masa shtesë ku linket në SMS verifikohen paraprakisht nga operatorët, pikërisht për shkak të rritjes së mashtrimeve digjitale. Po ashtu, është shumë e rëndësishme që qytetarët të kenë një mënyrë të thjeshtë raportimi kur marrin SMS apo linke të dyshimta, në mënyrë që rastet të identifikohen dhe bllokohen sa më shpejt”, përfundoi Kerolli për KlanKosova.tv.
