Gazetari Visar Duriqi, ka promovuar sot librin e tij “Mësuesi që u bë vrasës”, ku protagonist të saj e ka Nazim Bllacën, një figurë e cila lidhet me dyshime për spiunazh në Kosovë për llogari të Serbisë.
Përmbajtja e veprës sipas autorit, bazohet në një arkiv voluminoz të komunikimeve të Nazim Bllacës, dokumente autentike si dhe pjesë nga bisedat direkte që Duriqi ka pasur me të.
Historia e një marrëdhënieje dikur mes mësuesit dhe nxënësit, u shndërrua në një rrëfim të thellë prej 227 faqesh.
Autori Visar Duriqi, këtë të enjte, promovoi librin “Mësuesi që u bë vrasës”, ku në qendër të ngjarjes qëndron Nazim Bllaca, një figurë e mbështjellë me dyshime për krime, si dhe spiunazh në Kosovë në emër të Serbisë.
Gazetari Duriqi tha se për librin punoi afro 1 vit dhe së për të, ndër tjerash, i falënderohet kohës që i dha mundësinë të jetë pjesë e një historie si ajo që kaloi.
“Po du me falënderu kohën në të cilën kam lind dhe kam jetu, kohën që më ka ra me njoft edhe personalisht Nazim Bllacën, edhe me e bë ai gabimin e madh që me i besu një gazetari, me ia dhënë passwordin e email-it”, ka thënë Duriqi.
Drejtori i Institutit Kosovar për Kërkime dhe Zhvillime të Politikave, Lulzim Peci, e konsideroi këtë libër një vepër të rëndësishme për një nga pjesët më të errëta të kujtesës kolektive.
“Këtu nuk kemi të bëjmë vetëm me një rrëfim apo një kronikë kriminale të pasluftës, por me një libër që prek një nga nyjet më të errëta të jetës tonë publike, institucionale dhe të kujtesës sonë kolektive. Në leximin tim, kjo vepër nuk është vetëm biografi kriminale e antiheroit Nazim Bllaca, ajo është e një kohe që liria kishte ardhur në Kosovë por shteti ende nuk ishte konsoliduar”, ka thënë Peci.
Ndërkohë, Bekim Musliu nga Instituti i Kosovës për Drejtësi, tha se libri bëhet edhe më i besueshëm kur vetë autori është pjesë e historisë që shpjegohet aty.
“Libri nuk është vetëm për një personazh si Nazim Bllaca, por është një libër që flet se si ndërtohet e vërteta në një shoqëri post-konflikti dhe kush e ndërton atë të vërtetë. Libri rrëfen histori interesante por që në përmbajtje janë shumë interesante, por në fakt kriminale”, ka thënë Musliu.
Sipas autorit të librit, përmbajtja e veprës bazohet në një arkiv voluminoz të komunikimeve të Nazim Bllacës, një seri dokumentesh autentike si dhe pjesë nga bisedat direkte që vetë autori ka pasur me të.
