Në Kosovë është shndërruar në problem çështja e mbindërtimeve në objekte banesore që po kryhet pa leje, duke paraqitur problem me rastin e legalizimit të objekteve. Një rast i tillë po ndodh edhe në qytetin e Skenderajt ku në kompleksin banesor po dyshohet se janë duke u ndërtuar disa kate pa leje, më saktësisht duke tejkaluar lejen ndërtimore.
Fjala është për kompleksin banesor Kabashi Invest Imperial, ku në redaksinë e Veriu.info kanë arritur denoncime të besueshme, të cilat bëjnë të ditur se disa kate investitore po i ndërton pa leje, por që komuna nuk po reagon me ndërprerje të punimeve, duke ngjallur dyshime për keqpërdorim të detyrës zyrtare nga personat përgjegjës në komunë.
Veriu.info ka kërkuar qasje në dokumente publike në Komunën e Skenderajt, por nga drejtoria përkatëse nuk na janë dokumentet, por kanë ofruar vetëm shikimin e tyre, duke shkelur në mënyrë flagrante Ligjin për Qasje në Dokumente Publike, i cili garanton secilit qytetar, përfshirë edhe gazetarët të kenë qasje dhe të marrin një kopje të dokumenteve publike pranë secilit institucion.
Duke tentuar që të na bëjnë të ‘harrojmë’ këtë çështje, fillimisht nga Komuna e Skenderajt është kërkuar afat shtesë prej 15 ditësh në dhënie të qasjes në dokumente, pastaj kanë thënë se nuk mund të na i ofrojnë fizikisht kopjet e tyre, duke ngjallur edhe më shumë dyshime për tentim të fshehjes së mbindërtimit të cilin po e bën Kabashi Invest Imperial para ‘hundëve’ të Komunës.
Sot, Veriu.info ka kërkuar përgjigje nga Komuna e Skenderajt se pse nuk po vepron në ndalim të punimeve jashtë lejes ndërtimore, por në e-mail nuk janë përgjigjur Drejtori i Urbanizimit e as Drejtori i Inspeksionit.
Ndryshe, zyrtarët komunal të Skenderajt viteve të fundit janë bërë të njohur për mos-veprim në zbatim të Ligjit për Ndërtim, ku për pasojë Prokuroria Themelore në Mitrovicë më 10 qershor 2024 ka ngritur aktakuzë kundër Valon Halitit, Zenë Rushitit dhe Driton Mulajt. (https://betimiperdrejtesi.com/deklarohen-te-pafajshem-tre-zyrtaret-e-skenderajt-te-akuzuar-per-korrupsion/)
Aty thuhet se dy të pandehurit e parë më 13 qershor 2023 dhe i pandehuri Mulaj më 15 gusht 2023, në Skenderaj, në cilësinë e zyrtarëve me dashje dhe në kundërshtim me dispozitat ligjore të Ligjit nr.04/L-110, Ligjit nr.04/L-175, nuk ia kanë ndërprerë punimet në gërmimin – eksploatimin e dheut operatorit ekonomik konsorciumin “Andrra&Asons” SH.P.K., i cili nuk kishte pasur leje ndërtimi, ndërsa i pandehuri Mulaj operatorit të lartcekur ia ka lëshuar lejën ndërtimore në kundërshtim me kushtet ndërtimore të përcaktuara nga Drejtoria e Urbanizmit.
Në pikën e parë të aktakuzë thuhe se, i pandehuri Valon Haliti në cilësinë e drejtorit të Inspektoratit në Komunën e Skenderajt, duke e shfrytëzuar detyrën e tij zyrtare me qëllim që të përfitoj operatori ekonomik konsorciumin “Andra&Asons” Sh.P.K., nuk ia ka ndërprerë punimet ndërtimore këtij operatori, dhe në këtë mënyrë i është shkaktuar dëm material komunës së Skenderajt, të dëmtuarit D.Xh në shumë prej 76 mijë e 791 euro 32 centë, ndërsa të dëmtuarit F.S në shumë prej 60 mijë euro.
Me këto veprime, Valon Haliti akuzohet se ka kryer veprën penale “Keqpërdorim i pozitës apo autoritetit zyrtar” nga neni 414 paragrafi 3, nënparagrafi 3.2 lidhur me paragrafin 2 të KPRK-së.
Sipas pikës së dytë të aktakuzës, i pandehuri Zenë Rushiti në cilësinë e inspektorit të ndërtimit në Komunën e Skenderajt ka shfrytezuar detyrën e tij zyrtare me qëllim që të përfitoj operatori ekonomik konsorciumin “Andra&Asons” Sh.P.K., nuk ia ka ndërprerë punimet ndërtimore këtij operatori edhe pse ka qenë në dijeni se i njëjti nuk ka leje ndërtimore, dhe nuk i ka shqiptuar gjobë përkundër faktit që i ka përpiluar procesverbalet, dhe në këtë mënyrë është shkaktuar dëm material komunës së Skenderajt, të dëmtuarit D.Xh në shumë prej 76 mijë e 791 euro e 32 centë, ndërsa të dëmtuarit F.S në shumë prej 60 mijë euro.
Me këto veprime, Zenë Rushiti po akuzohet se ka kryer veprën penale “Keqpërdorim i pozitës apo autoritetit zyrtar” nga neni 414 paragrafi 3, nënparagrafi 3.2 lidhur me paragrafin 2 të KPRK-së.
Ndërsa, në pikën e tretë të aktakuzës thuhet se i pandehuri Driton Mulaj në cilësinë e drejtorit të Urbanizmit në Skenderaj, ka shfrytëzuar detyrën e tij zyrtare, me qëllim që të përfitoj operatori ekonomik konsorciumin “Andra&Asons” Sh.P.K., ashtu që këtij operatori ekonomik, ia ka lëshuar lejen ndërtimore për ndërtimin e dy etazheve – kateve në bodrumin-2B, duke vepruar në kundërshtim me nenin 21 të Ligjit nr.04/L për Ndërtim dhe në kundërshtim me kushtet për ndërtim të përcaktuara nga Drejtoria e Urbanizmit.
