Raporti vjetor i auditimit për Ministrinë e Mjedisit, Planifikimit Hapësinor dhe Infrastrukturës, tashmë e shkrirë në dy dikastere, ka nxjerrë një mal me shkelje e parregullsi, veçanërisht në kontratat e lëshuara për projekte rrugore.
Dy rastet e evidentuara rezultojnë se bëhet fjalë për çmime vetëm nga 1 euro, ndërsa vlera e kontratës është 2 milionë e 970 mijë euro, raporton Klankosova.tv
Në të dhënat e raportit thuhet se:
“Konkretisht, janë ofruar çmime si në vijim:
Pozicioni 1.4 “Konstruksioni i trasës”, pika 1.4.1-furnizimi, bartja dhe shtrirja e rërës si mbrojtje e gjeotekstilit (t=5 cm/m3) me çmim 1€;
-Pozicioni 1.6 “Lëshesat rrethore”, pika 1.6.6-fi 600 me çmim 1€, fi 1000 me çmim 130€, si dhe dy fi 1000 me çmim 1€.”
Krejt kjo, ZKA ka konstatuar se ka ndodhur si rezultat i mangësive në kontrollet e brendshme dhe në zbatimin e kërkesave të legjislacionit për prokurimin publik nga ana e Ministrisë, raporton Klankosova.tv
Rrjedhimisht, Ligji për prokurimin publik, te neni për tenderët jo normalisht të ulët, përcakton që nëse një operator ekonomik e dorëzon një tender që është ose duket të jetë jo-normalisht i ulët, autoriteti kontraktues, në këtë rast ministria, duhet të dërgojë një kërkesë me shkrim tenderuesit ku i kërkon që të dorëzojë një ndarje të elementeve përbërëse të tenderit dhe shpjegime në lidhje me bazën e tenderit.
Por, ministria që udhëhiqej nga Liburn Aliu, konkretisht komisioni i vlerësimit nuk ka kërkuar fare sqarim për këto çmime shumë të ulëta.
Për pasojë, Auditori ka raportuar se kjo situatë shkakton mosrealizim të kontratës dhe në cilësinë e punimeve dhe jo vetëm kaq, edhe në transparencë e konkurrencë të drejtë në prokurimin publik.
