Duke nisur nga një qershori, kompanitë e mëdha në Kosovë nuk do të furnizohen njëjtë me energji elektrike, sikurse konsumatorët e tjerë.
Zyra e Rregullatorit të Energjisë ka vendosur që këto kompani të dalin në treg të hapur, dhe të kenë të drejtë që ta zgjedhin vet furnizuesin.
Këtu, hyjnë të gjitha kompanitë që kanë më shumë se 50 punëtorë, apo 10 milionë euro qarkullim.
E varësisht nga kërkesat, nga KESCO thonë se mund të ndryshojnë edhe çmimet e energjisë elektrike për këto biznese.
“Në këtë periudhë të gjithë punëtorët që kanë mbi 50 punëtor ose mbi 10 milionë euro qarkullim automatikisht do të dalin në treg të hapur çfarë kemi bërë ne si kompani është që kemi dërguar nga një njoftim për secilin konsumator të cilët në rast që nuk i përmbushin këto kritere të vijnë tek ne me disa dokumente nga Administrata Tatimore e Kosovës, të na dëshmojnë se ata do të mund të furnizohen me tarifa të rregulluar të energjisë elektrike nga KESCO por në anë tjetër të gjithë ata konsumator që nuk i sjellin brenda kësaj periudhe i bijë që nuk i kanë plotësuar kriteret”, ka deklaruar për teve1 Margarita Rashiti- zëdhënëse e KESCO-s.
Me këtë ndryshim, nuk po pajtohen në Odën Ekonomike të Kosovës.
Kryetari i OEK-ut, Lulëzim Rafuna thotë se KESCO do t’i përcaktoj vet çmimet, pasi sipas tij furnizuesit e tjerë nuk do të kenë sasi të mjaftueshme për t’u ofruar bizneseve.
“Këtu krijohet një pabarazi shumë e madhe në mes të bizneseve të mëdha dhe të vogla. Bizneset e vogla mbesin me çmimin e rregulluara nga ZRRE ndërsa bizneset e mëdha detyrohen të blejnë energji elektrike me çmim me të lartë. E kjo pastaj ka pasoja të produkti final ku do ta kemi një produkt me çmim shumë më të lartë që do të faturohet konsumatorit të Kosovës.”
KESCO, ai thotë nuk i konsultoi fare bizneset për këtë ndryshim.
Mirëpo, ndryshe nga Rafuna, eksperti i energjetikës, Vezir Rexhepi, argumenton se kjo do të jetë një mundësi e mirë për kompanitë.
“Zyra e rregullatorit të energjisë i ka vendosur rregullat edhe për procesin e liberalizimit të tregut të energjisë elektrike. Në këtë kontekst është paraparë që edhe kompanitë që kanë qarkullim mbi 10 milionë euro edhe mbi 50 punëtor të ofrohet mundësia për furnizuesin të jenë pra kështu të pavarur kuptimin e zgjedhjes së furnizuesit të energjisë elektrike. Për këto do të thotë se ato do të kenë mundësi shumë të mira në mënyrë që të furnizohem me një furnizues cilindo që ato që ato zgjedhin për kushte me të mira të çmimeve për transparencë me të madhe për inovacion”, ka deklaruar ai.
Bizneset së bashku me Zyrën e Rregullatorit, të hënën pritet të mbajnë një takim ku do të diskutojnë për vendimin e ri.
