Policia e Shtetit ka zbuluar tre ambiente të përshtatura për lojëra fati dhe shpërndarje droge në Milot dhe Laç, duke arrestuar tre persona, proceduar një tjetër dhe shpallur në kërkim një shtetas.
Në pranga ranë 21-vjeçari Sh.P., 33-vjeçari D.M dhe 45-vjeçari Y.V., ndërsa në kërkim u shpall 31-vjeçari P.Ll.
Gjatë kontrolleve të ushtruara, në një nga ambientet në Laç u konstatua se, përveç organizimit të lojërave të fatit, zhvillohej edhe aktiviteti i shitjes së lëndëve narkotike, ku u gjet kokainë e ndarë në doza, gati për shpërndarje.
Në një tjetër ambient në Milot u sekuestruan pajisje për lojëra fati, ndërsa një subjekt tjetër rezultoi i pajisur me makina dhe tavolina pokeri, të cilat dyshohet se përdoreshin për aktivitet të paligjshëm.
Policia ka sekuestruar 15 makineta, 3 tavolina pokeri, kokainë, para dhe sende të tjera të kundërligjshme, ndërsa materialet procedurale i janë referuar Prokurorisë së Lezhës për veprime të mëtejshme.
