Blerim Sallahu është emëruar Këshilltar Ligjor i kryeministrit Albin Kurti, ndonëse para kësaj pozitë ai ishte numri dy i Ministrisë së Drejtësisë në Qeverinë Kurti 2.
Ai shërbeu për disa vite si Zëvendësministër i Drejtësisë dhe më pas si ushtrues detyre i Ministrit të Drejtësisë.
Megjithatë, në përbërjen e re të qeverisë, ai nuk do të ketë më rol drejtues në ekzekutiv, duke kaluar në pozitën e këshilltarit ligjor në kabinetin e kryeministrit.
Në praktikën politike, një lëvizje e tillë konsiderohet si degradim institucionale, ndonëse Sallahu këtë angazhim e sheh si vazhdim të kontributit të tij në forcimin e shtetit.
Këtë e ka bërë të ditur vetë Sallahu përmes një postimi në Facebook.
Postimi i plotë:
Me nder dhe përgjegjësi të veçantë ju njoftoj se, me ftesë të Kryeministrit të Republikës së Kosovës, Albin Kurti, i bashkohem Kabinetit të tij në cilësinë e Këshilltarit Ligjor.
Pas përvojës sime institucionale si Zëvendësministër i Drejtësisë dhe më pas si ushtrues detyre i Ministrit të Drejtësisë, e shoh këtë angazhim si vazhdim të përkushtimit tim për të kontribuar në forcimin e shtetit të së drejtës dhe institucioneve të Republikës së Kosovës
Ky moment për mua ka edhe një domethënie të veçantë personale. Shumë vite më parë kemi punuar së bashku në zyrat e Lëvizjes Vetëvendosje me Kryeministrin e sotëm, në një kohë kur ai ende nuk e mbante këtë detyrë. Sot, angazhimi im në Kabinetin e tij është vazhdim i një rrugëtimi të përbashkët të ndërtuar me besim, përkushtim dhe punë ndër vite.
Mirënjohës për besimin dhe i vendosur të vazhdoj të jap kontributin tim me përgjegjësi dhe profesionalizëm në shërbim të Republikës sonë.
