Dje presidenti i Serbisë, Aleksandar Vuçiq, mbajti një fjalim, ku shpalosi disa “kërkesa” për Kosovën. Gjatë fjalës së tij, Vuçiqi kërkoi kthimin “në gjendjen e mëparshme” në veri, duke renditur kërkesën për shpalljen e zgjedhjeve të reja në katër komunat e veriut të Kosovës dhe rikthimin e serbëve në polici e tërheqjne e njesiteve speciale.
Pas kësaj deklarate, zyrtarë të lartë të Lëvizjes Vetëvendosje kanë nisur një fushatë të egër të kritikës ndaj tri partive opozitare. Në interpretimet e VV-së, Vuçiqi ka kërkuar rithkimin e PDK-së, LDK-së dhe AAK-së, një interpretim i paqëndrueshëm.
Çka po thotë VV-ja?
Më i qarti në këtë interpretim ishte Hysamedin Feraj, këshilltar i kryeministrit Albin Kurti. Duke e cituar një thënie të Vuçiqit, Feraj tha se president serb ka kërkuar kthimin në gjendjen kur Serbia qeveriste veriun e Kosovës, ndërsa pjesën tjetër PDK-ja, LDK-ja dhe AAK-ja.
“Vuçiqi paska kërkuar kthimin në gjendjen kur qeversnin: në Kosovën veriore Serbia, në pjesën tjetër PDK-LDK-AAK (duke u kombinuar herë me njërën herë me tjetrën)…
Edhe kandidati për kryeministër i PDK-së, z. Bedri Hamza ka premtuar se “do të revidojë” të gjitha veprimet e njëanshme të qeverisë Kurti (LVV-Guxo), pra do të kthej gjendjen siç ka qenë: në Veri qeverisë Serbia, në pjesën tjetër PDK-LDK-AAK. Sigurisht mbas zgjedhjeve të 9 shkurtit 2025.
(Përputhja e kërkesave të Vuciqit me programin elektoral të opozitës së Kosovës, pra kthimi në gjendjen kur qeverisnin LDK-PDK-AAK, para qeverisë Kurti, duhet të jetë thjesht rastësi)” – ka shkruar Feraj ndër të tjera.
Në këtë linjë të argumentimit është edhe deputeti i VV-së, Mefail Bajqinovci, i fili fillimisht shpëndau një fotografi me citatin e Vuçiti, duke shtruar një pyetje, që më shumë i ngjante pyetjes retorike.
“A thua kë po e kërkon Vuçiqi? Jepni mendimim tuaj në komente” – shkroi Bajqinovci.
E në mëngjes të së shtunës, Bajqinovci shkroi pak më gjatë, duke ua shtruar dy pyetje opozitës.
“A ka qëndrim LDK dhe PDK për kërkesën e Vuçiqit për kthimin në gjendjen e mëparshme të veriut?
Nëse për sulmin terrorist në Banjskë, armët e kapura të terroristëve dhe gjendjen e serbëve në veri, LDK dhe PDK kanë shfaqur qëndrimet e tyre.
Çfarë qëndrimi ka opozita për kthimin e veriut në gjendjen e mëparshme, që është një nga 7 pikat e Vuçiqit?” – ka shkruar Bajqinovci.
Ndërsa deputetja Fitore Pacolli shkoi një hap më tutje, duke i përngjasuar kërkesa e opozitës dhe analistëve me ato të Vuçiqit.
“A kanë ngjashmëri kërkesat e Vuqiçit me ato të opozitës dhe disa “analistave” këtu në Kosovë a veç mua po më doket” – shkroi Pacolli.
Çka tha Vuçiqi?
Dje gjatë një konferencë për media, Vuçiqi paralajmëroi një “fushatë globale diplomatike” për të bindur ndërkombëtarët për plotësimin nga Kosova të kërkesave të Serbisë, të cilat sipas presidentit serb janë dakorduar në dialogun e ndërmjetësuar nga BE-ja.
“Kërkojmë shpalljen dhe mbajtjen e zgjedhjeve lokale të lira dhe demokratike në veriun e Kosovës, me pjesëmarrjen e misionit të Organizatës për Siguri dhe Bashkëpunim në Evropë dhe mbikëqyrjen e Bashkimit Evropian. Kthimin e serbëve në Drejtorinë Rajonale të Policisë së Kosovës për veriun dhe kthimin e gjyqtarëve dhe prokurorëve serbë në funksionet e tyre gjyqësore. Tërheqjen e forcave të posaçme të Policisë së Kosovës nga veriu” – ka deklaruar presidenti Vuçiq, duke shtuar se duhet të formohet Asociacioni i komunave me shumicë serbe.
