Ka përfunduar seanca dëgjimore ndaj kryeshefit të Korporatës Energjetike të Kosovës (KEK), Nagip Krasniqi.
Lajmin për përfundimin e seancës e ka konfirmuar për Gazetën Express avokati i Krasniqit, Taulant Ferizi.
“Seanca ka përfundu, nuk ka vendim ende.
Të paktën nuk jemi të informuar që ka vendim, kaq mundem me u deklaru njëherë”.I pyetur se cilët ishin fjalët e klientit të tij në gjykatë, avokati tha se ai ka kërkuar të mos i shqiptohet masa e paraburgimit.
“Dihen fjalët e tij, ka kërku mos me ju shqiptu masa e caktimit të paraburgimit”, tha avokati duke refuzuar të flasë më shumë rreth kësaj çështje.
Një vendim pritet ta marrë sot gjykata, pas kërkesës së Prokurorisë Speciale për caktimin e masës së paraburgimit ndaj Krasniqit.
Kryeshefi i Korporatës Energjetike të Kosovës (KEK), Nagip Krasniqi, u arrestua të mërkurën nën dyshimin për kryerjen e tri veprave penale, ’Keqpërdorimi i pozitës apo autoritetit zyrtar’’, ‘’Ushtrimi i ndikimit’’ , dhe ‘’Konflikti i interesit’’.Krasniqi me vendim të prokurorit u dërgua në mbajtje për 48 orë, ndaj tij PSRK ka kërkuar caktimin e masës së paraburgimit.
Njësia e Veçantë e Hetimeve ka bastisur zyrën e Krasniqit në Prishtinë, dy banesa në lokacione të ndara në Prishtinë, në pronësi dhe të shfrytëzuara nga i njëjti, “me qëllim gjetjen e dëshmive të cilat kanë të bëjnë me veprat penale të lartcekura”, ka njoftuar prokuroria.
“Gjatë bastisjes janë sekuestruar dokumente të ndryshme që ndërlidhen me rastin, pajisje elektronike si tre (3) kompjuter, një (1) llap-top, një (1) celular, një (1) USB, në cilësi të provave materiale që do të shërbejnë për procedurën e mëtejme”, ka njoftuar prokuroria.
