Drejtori i së ashtuquajturës Zyrë për Kosovë në Qeverinë e Serbisë, Petar Petkoviq ka reaguar pasi Kosova akuzoi Serbinë për sulmin në kanalin e ujit të Ibër-Lepencit.
Sipas tij, dëmtimi i këtij kanali është në kundërshtim edhe me interesat e Serbisë.
“Ky lloj incidenti, i cili do të çonte në një lloj fatkeqësie humanitare, është në kundërshtim me interesat e Republikës së Serbisë dhe popullit serb në Kosovë, sepse ndër të tjera është dëmtuar edhe kanali në fshatin Varagë i cili u sjell ujë edhe serbëve që jetojnë në veri të Kosovës, prandaj absolutisht nuk është në interes të Beogradit dhe popullit serb në Kosovë”, tha Petkoviq për Radiotelevizionin e Serbisë.
Ai përkujtoi se Beogradi ka ftuar KFOR-in dhe EULEX-in që të kryejnë një hetim të pavarur, duke theksuar se nëse vërtetohet se ka marrë pjesë kushdo, i cili është qytetar i Serbisë, ai do të mbajë përgjegjësi dhe se të njëjtën gjë pret edhe nga Kosova.
