Zyra e Presidentes së Kosovës ka potencuar se letra e Qeverisë së Kosovës dërguar Këshillit të Evropës ku theksohet se do të përpilohet një draft-statut për Asociacionit të Komunave me Shumicë Serbe dhe i njëjti do të dërgohet në Gjykatë Kushtetuese për shqyrtim deri në fund të muajit maj, nuk është konsultuar dhe dakorduar me presidenten e Kosovës, Vjosa Osmani.
“Presidentja Osmani përkrahë vetëm qëndrime dhe veprime paraprakisht të konsultuara, të koordinuara dhe të dakorduara me institucionin e Presidencës si institucion kushtetues me kompetenca të qarta në fushën e politikës së jashtme dhe si gardian i funksionimit kushtetues të institucioneve”.
Sipas Presidencës çdo derivat i letrës së zotimeve të nënshkruar nga tri institucionet duhet paraprakisht po ashtu të koordinohet dhe miratohet nga po këto tri institucione.
“Presidentja Osmani gjatë gjithë ditës po vazhdon konsultimet me aleatët rreth çështjes së anëtarësimit në Këshill të Evropës, ashtu siç ka bërë për një kohë të gjatë, me qëllim të zhbllokimit të këtij procesi”.
Rrjedhimisht, Osmani, sipas Presidencës, do ta mbështesë çdo veprim në drejtim të realizimit të këtij synimi, në përputhje të plotë me interesat shtetërore dhe Kushtetutën e Republikës së Kosovës.
“Prandaj edhe po bën përpjekje që shtetet anëtare të binden që sa më parë që të jetë e mundur të thirret një seancë e jashtëzakonshme ku do të votohet pro anëtarësimit të Kosovës në këtë organizatë”.
