Granit Paçarizi është arrestuar sot nga Policia e Kosovës. I njëjti dyshohet se ka sulmuar Drejtorinë për Shërbime Publike në Komunën e Prizrenit. Ndaj tij Prokuroria Themelore në Prizren, ka kërkuar një muaj paraburgim, siç merr vesh Insajderi kjo kërkesë është aprovuar.
Paçarizit i është caktuar masa prej 30 ditësh paraburgim.
Ai është një nga njerëzit më të afërt të Totajt, i cili e ka mbështetur fuqimisht atë gjatë zgjedhjeve të fundit lokale.
Kush është Granit Paçarizi dhe lidhja me Shaqir Totajn?
Granit Paçarizi, është biznesmen nga Prizreni.
Paçarizi është një nga njerëzit më të afërt të Totajt, i cili e ka mbështetur fuqimisht atë gjatë zgjedhjeve të fundit lokale.
I njëjti është edhe emër i njohur për organet e rendit.
“Ka me të vra para Komune, nuk ke me gëzu pensionin”, si i kishte kërcënuar biznesmeni zyrtarët komunal?
Biznesmeni prizrenas Granit Paqarizi ishte arrestuar më 5 prill 2022, pasi dyshohej se kishte kanosur personat zyrtarë të Drejtorisë për Shërbime Publike në Komunën e Prizrenit.
Paqarizi sic ka raportuar Insajderi, i ka thënë drejtorit të Shërbimeve Publike, Çelë Lamajt dhe stafit të tij, se “nuk guxojnë ta ndërpresin kontratën e projektit: Instalimi i ndriçimit publik dhe riparimi i ndriçimit publik ekzistues në Komunën e Prizrenit”, kontratë kjo që ishte fituar nga miqtë e biznesmenit prizrenas, shkruan Gazeta Insajderi.
Përfshirje e mëparshme në raste të dhunshme
Në vitin 2013, Paqarizi ishte përfshirë në një përleshje me armë zjarri, ku ishin plagosur disa persona. Ai ishte akuzuar për armëmbajtje pa leje dhe shpallur fajtor. Më pas, prokuroria e kishte rihapur rastin duke e akuzuar për veprën “Vrasje e rëndë në tentativë”.
Për këtë vepër, Paqarizi ishte dënuar me 2 vite e gjysmë burgim dhe dërguar për vuajtje të dënimit në Qendrën Korrektuese në Smrekonicë.
Rasti i sulmit fizik për një kontest pronësor
Më 7 maj 2022, Paqarizi u përfshi në një tjetër incident në rrugën “Sheh Kadrija” në Prizren, ku kishte sulmuar fizikisht 65-vjeçarin Agim Kastrati për një mosmarrëveshje pronësore. Ai fillimisht e kishte kërcënuar viktimën dhe më pas e kishte goditur me duar, duke i shkaktuar lëndime të lehta.
Afera e rëndë e gushtit 2024 – dyshohet për dhunim
Më 21 gusht 2024, 38-vjeçari dyshohej për një rast dhunimi në një motel në Fushë Kosovë. Një vajzë 21-vjeçare kishte raportuar në Polici se ishte viktimë e dhunës seksuale, duke pretenduar se Paqarizi, pa pëlqimin e saj, kishte kryer marrëdhënie seksuale me të.
Rasti kishte ndodhur në motelin “Diamonds”. Sipas burimeve të Sinjalit, biznesmeni e kishte mashtruar vajzën duke i thënë se gjithçka ishte masazh. Pas raportimit, Policia kishte nisur kërkimet dhe e kishte intervistuar Paqarizin si të dyshuar. Pas procedurave, ai ishte dërguar në mbajtje për 48 orë, nën dyshimet për veprën penale “Dhunimi”.
