Avdullah Hoti i Lidhjes Demokratike të Kosovës, ka reaguar lidhur me projektin e gazit amerikan, duke e cilësuar atë si një çështje strategjike për orientimin e Kosovës dhe raportet me Shtetet e Bashkuara të Amerikës.
Ai tha se kundërshtimi i projektit nga qeveria nuk duhet të kalojë pa reagim qytetar, duke theksuar se qytetarët e Kosovës mbeten të përkushtuar ndaj aleancës me SHBA-në dhe vlerave euroatlantike.
Sipas Hotit, Kosova nuk duhet të largohet nga rruga që e ka ndjekur deri më tani.
Postimi i plotë:
Të dashur qytetarë dhe miq,
Çështja e projektit të gazit është shumë më e madhe dhe më serioze sesa po paraqitet sot. Kjo nuk është vetëm një çështje infrastrukture apo energjie është një provë e qartë për orientimin strategjik të Kosovës dhe për raportin tonë me aleatin tonë historik, Shtetet e Bashkuara të Amerikës.
Në një kohë kur qeveria po e kundërshton këtë projekt, heshtja nuk është opsion. Reagimi qytetar është i domosdoshëm për të treguar se populli i Kosovës mbetet fuqishëm i rreshtuar krah aleancës me SHBA-në dhe vlerave euroatlantike.
Kosova nuk guxon të largohet nga rruga që e ka sjellë deri këtu. Ky është moment për zërin e qytetarëve.
