Në kuadër të hulumtimit për kompanitë që kanë futur ose tentuar të fusin produkte ushqimore në tregun e Kosovës me përbërës të rrezikshëm, Veriu.info ka zbuluar se në kompaninë “Swiss Group”, e cila menaxhon fabrikën e përpunimit të mishit të pulës dhe viçit “Sëiss Food’s”, është gjetur produkt i mishit i rrezikshëm për konsum.
Veriu.info ka siguruar një procesverbal të inspektorëve veterinar të Agjencisë së Ushqimit dhe Veterinarisë, ku bëhet e ditur se në këtë kompani është gjetur mish “shnicëll pule” analizat e të cilit kanë dalë të pakënaqshme në kriterin e sigurisë “Salmonella”.
Inspektorët aty konstatojnë asgjësimin e mishit që ka rezultuar i rrezikshëm për konsum, për të cilët thonë se nuk lejohet të shitet apo tjetërsohet.
Sipas dokumentit të siguruar nga Veriu.info, testimi i këtij mishi është bërë më 15.10.2024 në Laboratorin e Ushqimit dhe Veterinarisë.
Kompania “Swiss Group” nuk ka kthyer përgjigje në pyetjet e Veriu.info për këtë asgjësim mishi me ‘salmonella’.
Çka do të thotë testimi pozitiv për “Salmonella”?
Ky rezultat testimit nënkupton se analizat laboratorike kanë zbuluar prani të baktereve të llojit ‘Salmonella spp’. në mishin e testuar, që paraqet rreziqe për Infeksione gastrointestinale (Salmoneloza) dhe komplikime tjera si: Septikemi (infeksion në gjak) në raste të rënda, Artrit reaktiv pas infektimit (forma e reumatizmit të shkaktuar nga infeksioni), por edhe mund të jetë vdekjeprurës në persona me sistem të dobët imunitar
Ndërsa, grupet më të rrezikuara janë: Foshnjat dhe fëmijët e vegjël, të moshuarit, gratë shtatzëna dhe personat me sëmundje kronike ose imunitet të dobësuar.
Kush është “Swiss Group”?
Në ueb faqen e “Swiss Group” thuhet se është një kompani e specializuar në prodhimin dhe shpërndarjen e produkteve të mishit, me fokus në mishin e pulës dhe viçit. Me një përvojë të gjatë në treg, ne kemi krijuar një reputacion të fortë për cilësi dhe besueshmëri.
Kjo kompani në përshkrimin e bërë rreth saj, thotë se misioni i tyre është ofrimi i produkteve të shëndetshme dhe me cilësi të lartë, duke ndikuar pozitivisht në shëndetin dhe kënaqësinë e konsumatorëve tanë, por që rasti për të cilin kemi siguruar dokumentacion tregon se në këtë kompani është gjetur mish jashtë stadardeve, që paraqet rrezik serioz për shëndetin e konsumatorëve.
“Swiss Group” menaxhon me fabrikën e përpunimit të mishit “Swiss Foods” që gjendet në Graçanicë, ku nëpër njoftime thonë se janë të certifikuar për “mish hallall”.
Fotot e asgjësimit të mishit:
Artikuj të ngjashëm:
Skandal: Kapet mish i bluar “Çobani” me baktere të rrezikshme (Foto/dokument)
Skandal: Prodhuan miell Tip 400 pa përbërës të duhur, dënohen mullinjtë “Amidoni” e “Blerina”
