Kaltrina Kasumi, ish-këshilltarja e ish-ministrit të Shëndetësisë Arben Vitia, është avancuar me shpejtësi në detyrë brenda Qendrës Klinike Universitare të Kosovës (QKUK). Ajo fillimisht ishte e punësuar si recepsioniste, më pas është transferuar në Zyrën e Financave, ndërsa avancimi i saj është tentuar të mbahet i fshehur nga ky institucion publik.
Si u punësua ish-këshilltarja e Vitisë në Zyrën e Financave?
QKUK për muaj të tërë ka refuzuar t’i përgjigjet Gazetës Insajderi lidhur me këtë rast, pavarësisht interesit publik për transparencë dhe llogaridhënie në punësimet dhe transferimet brenda institucionit më të madh shëndetësor në vend.
Vetëm pas një insistimi tre-mujor dhe pasi Insajderi e ka dërguar lëndën në Agjencinë për Informim dhe Privatësi (AIP), QKUK ka pranuar të konfirmojë zyrtarisht se ish-këshilltarja e Arben Vitisë ka kaluar në Zyrën e Financave.
Agjencia ka aprovuar ankesën kundër Shërbimit Spitalor dhe Klinik Universitar të Kosovës, duke konstatuar se institucioni ka dështuar të ofrojë qasje në dokumente publike lidhur me këtë rast.
Me vendim, AIP e ka obliguar QKUK-në që brenda shtatë ditësh të japë sqarime dhe dokumente për procedurat e ndjekura në transferimin dhe avancimin e Kaltrina Kasumit.
“Heshtja e institucionit publik duke mos ofruar qasje ndaj dokumenteve, objekt ankese e palës ankuese do të pengonte informimin publik mbi veprimtarinë e institucionit, duke cenuar rëndësinë e të drejtës për qasje në informacion publik“, thuhet në vendim.
Vetëm pas këtij vendimi, QKUK ka kthyer përgjigje për Insajderin.
Në përgjigje konfirmohet se Kaltrina Kasumi është transferuar nga recepsioniste në Zyrën e Financave.
Sipas QKUK-së, transferimi është bërë pasi pozita ka qenë e lirë për shkak të lëvizjes së një zyrtareje tjetër dhe si rezultat i nevojave funksionale të Sektorit të Buxhetit dhe Financave.
“Kaltrina Kasumi është transferuar në pozitën Zyrtar Administrativ, në përputhje me përgatitjen profesionale dhe në të njëjtën kategori të pagës. Transferimi është realizuar pasi pozita ka qenë e lirë, për shkak të lëvizjes së ish-Zyrtares Administrative, dhe në përputhje me nevojat funksionale të Sektorit të Buxhetit dhe Financave të QKUK-së”, thuhet në vendim.
Ndonëse QKUK nuk ka dërguar asnjë dokument për punësimin që do të dëshmonte transferimin e saj.
