Tarifa e produkteve të importuara në SHBA ka ngjallur diskutime të shumta.
Ndonëse Trumpi i vendosi tarifë prej 10% Kosovës, që në krahasim me vendet e tjera është më e lehtë, bizneset e shumta dhe akterë politikë kanë bërë thirrje që Kosova të punojë në heqjen e kësaj tarife, duke i hequr vet Kosova tarifat që i ka të vendosura ndaj SHBA-së.
Njohësi i tregjeve financiare, Emanuel Bajra, nuk parashikon impakt të madh në Kosovë, të këtyre tarifave.
Në një intervistë për IndeksOnline, Bajra deklaron se nuk kemi të bëjmë me një masë tarifore që ngarkon ekonominë e Kosovëss me borgje apo humbje të vendeve të punës.
“Sa i përket impaktit që do të kenë tarifat e Shteteve të Bashkuara të Amerikës, në Kosovë, unë mendoj që është minimal, për shkak se nuk kemi të bëjmë me një masë tarifore e cila do të ngarkojë ekonominë tonë me borgje ose do ta ndikojë ekonominë tonë me anë të humbjes së vendeve të punës apo diçka tjetër. Domethënë, impakti nuk është makro, nuk është i madh, për shkak se vet natyra e eksporteve dhe importeve tona në SHBA është gati minimale, nëse e marrim si peizazh të përgjithshëm ekonomik”, tha Bajra.
Atëherë, kë do ta ndikojë kjo tarifë?
Bajra vlerëson se tarifa prej 10% do të ndikojë te disa entitete dhe kompani, të cilat janë drejtpërdrejt të përfshira me eksportet në SHBA.
Sipas tij, këtyre subjekteve do t’iu goditet margjina që mund të jetë si pasojë e shtrenjtimit të importimit të mallrave në Amerikë.
“Ata do të duhej me ndërmarrë hapa për reduktimin e stafit ose reduktimin e shpenzimeve kapitale buxhetore, e të tjera. Pra, është problem dhe çështje më tepër e kompanive, prodhuesve dhe eksportuesve kosovarë, të cilët nuk janë në masë shumë të madhe, për shkak të mos harrojmë se distanca gjeografike e bën të veten. Edhe Kosova, nuk është që eksporton ndonjë mall të sofistikuar të tregut global, në SHBA”, shtoi Bajra.
Sipas tij, nuk ekziston ndonjë efekt prekës për ekonominë e Kosovës.
Bajra gjithashtu vlerëson se politizimi i tarifës është një çështje në të cilën Kosova duhet të jetë e kujdesshme me hapat që ndërmerr.
