Fatmirësisht, Ballkani nuk po duket territor interesant me u përfshi në këto lëvizje të mëdha globale, përkundër faktit që liderthët autokratë të rajonit tonë, me gjasë po i xhelozojnë pak këto zhvillime globale.
***
A ka fillu hala Lufta e Tretë Botërore, ajo luftë në të cilën janë të përfshira shtetet më të fuqishme të botës, ose në disa prej tyre, ne disa kontinente quhet Luftë Botërore. Pak a shumë, ky është definicioni i luftërave botërore.
Teknikisht, historia njeh dy luftëra botërore, praktikisht vetëm Lufta e Dytë Botërore i plotëson kushtet të quhet luftë e tillë sepse aty patën marrë pjesë ushtarakisht, Rusia, Amerika, Britania, Japonia, Kina dhe shumica e vendeve evropiane.
Lufta e Parë Botërore, pati filluar si një zënkë. Një djalë i ri serb, e pati vrarë një aristokrat austriak në rrugët e Sarajaveës duke i hapur pastaj rrugët e ferrit për kontinetin evropian.
Kurse, Lufta e Dytë Botërore ka fillu kur tanket e Gjermanisë kanë filluar të futen në Poloni.
Dikush thotë, nuk ka luftë të parë e të dytë, e gjitha është Luftë e Parë Botërore.
I kam dëgju gjeneratat e reja, duke pyetur, a është kjo Lufta e Tretë Botërore?
Ende jo! Por, nëse konflikti eskalon, do të dalin historianët dhe të thënë se Lufta e Tretë Botërore ka filluar ditën kur ushtarët rusë janë futur në Ukrainë, ose në ditën kur Hamasi e ka kapërcyer gardhin dhe ka hyrë në Izrael ose kur Izraeli e ka sulmuar me armë Iranin.
Njëra, prej këtyre momenteve.
Në dukje të parë, zhvillimet e fundit nuk janë domosdo të lidhura me njëra-tjetrën, por ja që janë.
Bota është e ndarë në dy boshte: Rusia, Kina, Irani, Koreja e Veriut në njërën anë, Amerika, Japonia, Koreja e Jugut, BE-ja në boshtin tjetër.
Pastaj, janë disa vende që hanë me dy lugë si India, Brazili e deri diku edhe Afrika e Jugut. Bie fjala, India është edhe me Izraelin edhe me Rusinë, por për inat të Pakistanit, nuk është me shtetet që kanë shumicë myslimane.
Kurse Arabia Saudite, kallauzi i vendeve myslimane sunni, e sheh Iranin si kundërshtarin kryesor në rajon, por për shkak të opinionit të brendshëm, nuk guxon të duket sikur gëzohet kur Izraeli e sulmon.
Përveç tjerash, me Iranin i ‘shtyjnë brinat’ edhe në Jemen.
Pak a shumë e njëjta situatë është edhe në Turqi. Le të thotë çka të dojë Erdogani, por Erdo shtyhet me Iranin për ndikim në Siri, deri dje ndikimin aty e ka pasë Irani, e sot e ka Turqia.
Kurse Egjipti, qendra tjetër e fortë islame, ende po i lëpien plagët nga Aventura me Vëllazërinë Islame.
A ka rrezik të zgjerohet konflikti, në mënyrë që ne të kemi privilegjin, e të jemi dëshmitarë të një Lufte Botërore, të përmasave të mëhershme.
Pak vështirë me besu, sepse nëse ndodhë diçka e tillë, nuk do të mbetet më kurrkush të tregojë se çka ka bë vaki.
Në Luftën e Dytë Botërore, shtetet që kanë luftuar me njëra-tjetrën, e kanë përdorë krejt arsenalin ushtarak kundër njëra-tjetrës.
Kurse, nëse sot, përdoret krejt arsenali kundër armiqve, kjo do të thotë se nuk ka më Champions League, por merr fund jeta e njeriut në tokë.
Prandaj, shtetet e fuqishme po luftojnë kundër njëra-tjetres, me të ashtuquajturit ‘proxy’ me bedela, sepse nuk janë të gatshëm t’i fusin ushtarët e tyre, kundër njëri-tjetrit.
Pra jo, nuk ka filluar Lufta e Tretë Botërore, por thjeshtë Fuqitë e Mëdha nuk po pajtohen me pozitat aktuale që kanë, po kërkojnë riakomodim të pozicioneve.
Kina, deri dje nuk kishte ambicie serioze në politikën e jashtme. Me rritjen ekonomike, iu ka rritë edhe ambicia.
Mirëpo, Kina e di, se askush nuk e merr aq seriozisht, nëse nuk e merr bile Tajvanin. Kurse miqësia e Kinës me Rusinë, nuk është aq stabile dhe e pathyeshme sa duket.
Këto dy megashtete, luftojnë për influencë përgjatë gjithë kufirit të tyre, që është i gjatë rreth 5.000 kilmetra.
Pra, Kina po kërkon më shumë rol në këtë botë, Rusia po kërkon ta kthejë rolin që kishte në këtë botë kurse Amerika po lufton ta mirëmbajë rolin që mori në këtë botë, pas rënies së Murit të Berlinit.
Bota vazhdon të jetë unilaterale, me Amerikën në qendër.
Kina po kërkon të jetë dypolëshe, Rusia tri.
BE në anën tjetër, është më shumë supermarket sesa shtet.
Loja veç sa ka filluar. Ajo çka ka ndodhur deri dje, mes Rusisë dhe Ukrainës, duket si lojë e fëmijëve mes asaj çka po ndodhë sot mes Iranit dhe Izraelit kurse kjo e fundit, mund të duket lojë e fëmijëve mes asaj se çka mund të ndodhë mes Kinës dhe Tajvanit apo në mes të dy Koreve.
Fatmirësisht, Ballkani nuk po duket territor interesant me u përfshi në këto lëvizje të mëdha globale, përkundër faktit që liderthët autokratë të rajonit tonë, me gjasë po i xhelozojnë pak këto zhvillime globale.
