Pas publikimit të një skandali me mashtrime të çmimeve në barnatore nga “Riga Pharm”, ka shpërthyer edhe një skandal tjetër i kësaj kompanie.
Disa njësi të rrjetit të barnatoreve “Riga Pharm” në Kosovë të cilat sipas të dhënave publike zyrtare janë në pronësi të Arta Zeqirit, dyshohet se kanë kryer shkelje të rënda ligjore, duke operuar në kundërshtim me standardet e përcaktuara dhe duke vënë në rrezik direkt shëndetin e qytetarëve.
Sipas dokumenteve që ka siguruar portali Front Online, më 17 shtator të vitit të kaluar, Inspektorati Farmaceutik ka realizuar një inspektim në barnatoren “Riga Pharm 3” në Kllokot.
Dokoment 1. Raporti i Inspektimit i Inspektoratit Farmaceutik në barnatoren Riga Pharm 3 në Kllokot
Raporti zyrtar i inspektimit evidenton se gjatë kontrollit, farmacistja përgjegjëse, Nakishe Qamili, nuk është gjetur në vendin e punës. Në momentin e inspektimit, në barnatore ishte e pranishme vetëm teknikja e farmacisë, Anita Shallti.
Në raportin e Inspektoratit precizohet saktë se gjatë inspektimit aty nuk ishte as farmacistja, por as zëvendësuesja.
“Në kohën e inspektimit në barnatore nuk ishte prezente farmacistja përgjegjëse, as ndonjë zëvendësuese. Me këtë rast konstatohet se pala ka vepruar në kundërshtim me nenin 14, paragrafi 2 të Ligjit për Produkte dhe Pajisje Medicinale, nenin 26, paragrafi 2 të Ligjit për Shëndetësi, si dhe nenin 6, paragrafi 3 të Udhëzimit Administrativ për qarkulluesit me pakicë të produkteve dhe pajisjeve medicinale, ku përcaktohet se barnatorja mund të funksionojë vetëm në prani të farmacistit” thuhet në raport, raporton Front Online.
Dokoment 2. Raporti i Inspektimit i Inspektoratit Farmaceutik në barnatoren Riga Pharm 3 në Kllokot
Ky konstatim nënvizon një shkelje serioze të legjislacionit në fuqi, duke qenë se mungesa e farmacistit përgjegjës cenon sigurinë e shpërndarjes së barnave dhe rrit rrezikun për trajtim të gabuar të pacientëve.
Në përfundim të raportit, Inspektorati Farmaceutik ka urdhëruar respektimin strikt të ligjit nga ana e farmacistes përgjegjëse, ndërsa ndaj barnatores është shqiptuar edhe masë ndëshkuese në formë gjobe.
Dokoment 3. Procesverbali i inspektimit të Inspektoratit Farmaceutik në barnatoren Riga Pharm 3 në Kllokot
Ky rast ngre shqetësime serioze për nivelin e kontrollit dhe zbatimit të ligjit në sektorin farmaceutik, si dhe për sigurinë e qytetarëve që marrin shërbime në këto institucione shëndetësore.
Për këtë çështje portali Front Online i ka dërguar pyetje rrjetit të barnatoreve Riga Pharm, por as pas disa ditë pritje nuk ka arritur të marrë përgjigje nga ta.
Shkelje ligjore në barnatore: Ligji kërkon prani të detyrueshme të farmacistit gjatë gjithë orarit të punës
Legjislacioni në fuqi në Kosovë përcakton shumë qartë kushtet për funksionimin e barnatoreve, duke vendosur standarde strikte për të garantuar sigurinë e qytetarëve gjatë furnizimit me produkte medicinale.
Dokument 4. Neni 14, paragrafi 2 i Ligjit për Produkte dhe Pajisje Medicinale
Sipas Nenit 14 të Ligjit për Produkte dhe Pajisje Medicinale, “Dispensimi dhe shitja me pakicë e produkteve medicinale” mund të realizohet vetëm nëse plotësohen disa kritere bazë ligjore.
Pra, në pikën 1 të këtij neni theksohet se për ushtrimin e këtij aktiviteti kërkohet:
Licencë biznesi e lëshuar nga autoriteti kompetent; Licencë profesionale e barnatores e lëshuar nga AKPPM.
Ndërsa në pikën 2 të Nenit 14 përcaktohet qartë një nga obligimet më të rëndësishme:
“Barnatorja duhet të ketë gjatë gjithë orarit të punës farmacist/farmaciste të licencuar.”
Ky detyrim ligjor është thelbësor për garantimin e shpërndarjes së sigurt të barnave dhe për parandalimin e gabimeve që mund të rrezikojnë shëndetin e pacientëve.
Sipas ligjeve në fuqi, mosrespektimi i këtij neni përbën shkelje serioze ligjore dhe mund të rezultojë me masa ndëshkuese, përfshirë gjoba apo pezullim të aktivitetit të barnatores.
Ligji i prerë: Barnat me recetë mund të jepen vetëm në prani të farmacistit të licencuar
Ligji në fuqi për sektorin farmaceutik në Kosovë përcakton qartë rregullat për shpërndarjen e barnave, duke vendosur masa të rrepta për mbrojtjen e shëndetit publik.
Sipas Nenit 26 të Ligjit për Shëndetësi, barnat që përshkruhen nga mjeku apo stomatologu nuk mund të jepen në mënyrë të pakontrolluar. Dispozita ligjore është e qartë:
“Barnat e përshkruara nga mjeku ose stomatologu mund të jepen vetëm nga ose në prezencën e farmacistit të licencuar.”
Dokument 5. Neni 26, paragrafi 2 i Ligjit për Shëndetësi
Ky përcaktim ligjor nënkupton se asnjë barnatore nuk ka të drejtë të shpërndajë barna me recetë në mungesë të një farmacisti të licencuar, pasi një veprim i tillë rrezikon drejtpërdrejt jetën dhe shëndetin e pacientëve.
Ligji kërkon staf të licencuar në barnatore: Farmacisti përgjegjës, figurë kyçe për sigurinë e barnave
Rregullimi ligjor i sektorit farmaceutik në Kosovë përcakton standarde të qarta për funksionimin e barnatoreve, duke vënë theks të veçantë në praninë e stafit profesional të licencuar.
Sipas Nenit 6 të Udhëzimit Administrativ për qarkulluesit me pakicë të produkteve medicionale, çdo barnatore obligohet të ketë një numër të mjaftueshëm të stafit profesional, i cili garanton dispensimin e barnave në përputhje me Praktikën e Mirë të Farmacisë.
Dokument 6. Neni 6 i Udhëzimit Administrativ për Qarkulluesit me Pakicë të Produkteve Medicionale
Në këtë kuadër, një rol kyç i takon farmacistit përgjegjës. Ligji përcakton se në çdo barnatore duhet të punojë të paktën një farmacist përgjegjës, i cili mban përgjegjësi të plotë.
Po ashtu, dispozita ligjore është e prerë edhe në një pikë tjetër thelbësore:
“Barnatorja mund të funksionojë vetëm në prezencë të farmacistit”, thuhet në udhëzim.
Mosrespektimi i këtyre standardeve jo vetëm që cenon cilësinë e shërbimit farmaceutik, por edhe rrit rrezikun për përdorim të gabuar të barnave nga qytetarët.
