Në kuadër të hulumtimit për disa transaksione financiare të dyshimta të FC Vushtrria, Veriu.info ka zbuluar se nga llogaria bankare e këtij klubi janë bërë pagesa në kundërshtim me marrëveshjen e sponsorizimit dhe vërtetimin e lëshuar nga Komisioni për Shqyrtimin dhe Vlerësimin e Kërkesave për Lëshimin e Vërtetimit për Sponsorizime në Fushën Sportit i Ministrisë së Kulturës, Rinisë dhe Sportit.
Gjatë hulumtimit Veriu.info ka gjetur edhe disa pagesa nga FC Vushtrria në xhirollogarinë e Mehdi Uka, U.d. Drejtor i Departamentit Ligjor në Ministrinë e Kulturës, Rinisë dhe Sportit, ministri e cila mbikëqyr klubet sportive për të parë se a po përdorin financimet e sponsorizimit në përputhje me ligjin.
Veriu.info ka siguruar transaksionet financiare me të cilat dëshmohet se FC Vushtrria ka paguar tri herë brenda gjashtë muajsh U.D. Drejtorin e Departamentit Ligjor të MKRS-së, Mehdi Uka. Fillimisht FC Vushtrrria më 21 nëntor 2024 e ka paguar Mehdi Ukën me 3 mijë e 300 euro në emër të ‘pagesë e kryer për marrëveshjet e sponsorizimit sipas kontratës’. Më pas janë realizuar edhe dy transaksione bankare në xhirollogari të U.D. Drejtorit të Departamentit Ligjor të MKRS-së, më 26 mars 2025 shuma prej 350 euro dhe më 26 maj 2025 shuma prej 877 euro.
Pra, një drejtor i MKRS-së që departamenti i tij është përgjegjës për hartimin e dokumenteve shtetërore për t’i kontrolluar klubet sportive se si po i menaxhojnë parat e sponsorizimit, paguhet nga një klub për ‘marrëveshjet e sponsorizimit’.
Këtu përveç që kemi dyshim të bazuar të konfliktit të pastër të interesit, kemi bazë edhe një skemë me elemente potenciale të ‘krimit financiar’, ku klubet përdorin zyrtarët e shtetit për marrëveshje sponsorizimi, të cilët ata zyrtarisht janë në rolin e kontrolluesit dhe mbrojtjes së interesit institucionale përballë një subjekti juridik tjetër.
Çfarë janë paratë e sponsorizimit?
Për ta shpjeguar më thjeshtë: Një biznes që fiton 1 milion euro gjatë vitit është i obliguar të paguaj 100 mijë euro tatim shtetit (ATK-së). Në bazë të Ligjit për Sponsorizim, 30% të tyre (30 mijë euro) mund t’i jap sponzorizim në një klub sportive dhe të njëjtat i zbriten nga tatimi në ATK, ku në vend të 100 mijë euro, i paguan 70 mijë euro. Kjo nënkupton se këto para të sponsorizimit janë praktikisht para të ATK-së, por që klubet e shfrytëzojnë këtë mundësi ligjore për mbështetje të klubeve (me para të shtetit). Pra, Në praktikë, sponsorizimi përmes zbritjes tatimore konsiderohet mjet publik me destinim të veçantë, i cili i është deleguar klubit për ta shpenzuar vetëm për qëllimin e miratuar nga MKRS
Një klub fillimisht duhet ta marë një vërtetim të sponsorizimit në MKRS për pranimin e sponsorizimit dhe në fund të periudhës së sponsorizimit dërgon raport në MKRS për të dëshmuar se i ka shfrytëzuar parat e sponsorizimit sipas planit të miratuar. Brenda MKRS-së përgjegjës për hartimit e Formularëve, udhëzuesit, dokumenteve tjera për aplikim për vërtetim të sponsorizimit, hartim të rregullores për përcaktimin e kritereve, procedurave dhe formës për vërtetimin e sponsorizimit në fushën e sportit është Departamenti Ligjor, i cili udhëheqet nga U.D. Drejtori, Mehdi Uka.
Pra, MKRS kontrollon klubet dhe jep miratim apo refuzim në fund, varësisht se a është shfrytëzuar sponsporizimi në mënyrë adekuate. Kur shkelet vërtetimi, atëherë parat duhet i kthehen shtetit.
Veriu.info për më shumë se dy muaj ka dërguar disa herë pyetje në MKRS për të marrë përgjigje për këtë çështje dhe për skandalet e tjera të FC Vushtrria në lidhje me shfrytëzimin e parave të sponsorizimit, por deri më tash nuk kemi marrë përgjigje, përfshirë as për rastin e Mehdi Ukës. Pyetjes i janë dërguar edhe kabinetit të ministrit në detyrë Hajrulla Çeku, por nuk kemi marrë përgjigje.
I pyetur nga Veriu.info se A keni patur të drejt zyrtar i MKRS të merrni mjete monetare nga një klub, të cilit MKRS i’a mbikëqyr shfrytëzimin e mjeteve të sponsorizimit, Mehdi Uka ka thënë se po.
“Po. Angazhimi im profesional me klubin ka qenë krejtësisht i ndarë nga detyrat e mia zyrtare në MKRS dhe pa asnjë ndikim në proceset e sponsorizimit, meqë pozita ime nuk është vendimmarrëse në këtë fushë. Kontrata për shërbime profesionale me klubin, ka qenë e lidhur në përputhje me legjislacionin në fuqi, të hyrat janë realizuar në mënyrë tërësisht transparente përmes bankës, dhe përgjegjësia për burimin e mjeteve i takon klubit. Prandaj, kompensimi ka qenë ligjor dhe i lejuar.”, ka thënë Mehdi Uka për Veriu.info.
Kur është pyetur se a ka patur autorizim ose cfarëdo dokumenti nga MKRS, me të cilin ju ësht lejuar të paguheni për marrëveshjet e sponsorizimit nga një klub futbolli, U.d. Drejtor i Departamentit Ligjor, Mehdi Uka ka thënë se nuk ka pasur autorizim.
“Jo. Ligji nuk e ndalon angazhimin profesional jashtë orarit të punës për zyrtarët publikë. Angazhimi im ka qenë i njohur dhe i deklaruar te mbikëqyrësi im, që përbën edhe standardin e kërkuar institucional.”, thuhet në përgjigjen e tij.
Ndërkaq, sa i përket konfliktit të interesit me këtë rast, sipas tij nuk ekziston.
“Absolutisht jo. Këtë e ka konfirmuar zyrtarisht Agjencia për Parandalimin e Korrupsionit (APK), në përgjigjen e protokolluar me nr. DPKI 2171/25 të datës 04.11.2025, e cila ka vlerësuar se angazhimi im si bashkëpunëtor i jashtëm nuk paraqet asnjë papajtueshmëri me Ligjin për Parandalimin e Konfliktit të Interesit. Ky opinion zyrtar e vërteton plotësisht se veprimi ka qenë ligjor, i rregullt dhe pa asnjë element konfliktual”, por që të njëjtin opinion nuk e ka prezantuar në përgjigje.
Çka thotë Ligji për Parandalimin e Konfliktit të Interesit në Ushtrimin e Funksionit Publik?
Neni 6 i Ligjit: Konflikti i interesit lind nga një rrethanë në të cilën zyrtari ka interes privat, që ndikon, mund të ndikojë ose duket se ndikon në kryerjen me paanshmëri dhe objektivitet të detyrës së tij zyrtare.
Ndërsa neni 1 që flet për punët e ndaluara për zyrtarin publik në paragrafin 1.2 thotë: punët e tilla mund të ndikojnë në paanshmërinë e ushtrimit të detyrës publike dhe cenojnë respektimin e parimeve të konkurrencës së lirë.
Detyrat e departamentit ligjor të MKRS?
Sipas të dhënave që gjenden në ueb faqen e MKRS-së, departamenti ligjor që udhëheqet nga Mehdi Uka, ndër të tjera është përgjegjës dhënien e këshillave ligjore, rekomandimeve, udhëzimeve dhe opinioneve të kërkuara nga njësitë organizative të ministrisë.
Pra, është përgjegjës për dhënien e këshillave ligjore, rekomandimeve e udhëzimeve Komisionit për Shqyrtimin dhe Vlerësimin e Kërkesave për Lëshimin e Vërtetimit për në Fushën e Kulturës, Rinisë dhe Sportit i Ministrisë së Kulturës, dhe Sportit. Në këtë rast Komisionit që është marrë me FC Vushtrrinë.
Siç e cekëm edhe më lartë, ky departament është përgjegjës edhe për gjitha dokumentet tjera të MKRS që kanë të bëjnë me implementimin e sponsorizimeve nga klubet.
Se a ka minimalisht konflikt interesi këtu, nuk don shpjegim të madh, sepse edhe një laik në këtë fushë e kupton konfliktin e pastër të interesit.
Nesër: Cilët zyrtarë të MKRS-së po heshtin përballë kësaj situate!
LEXONI EDHE:
