Agjencia e Ushqimit dhe Veterinarisë këtë vit ka nxjerrë 28 vendime për pezullim të lejeve të importit të kafshëve të gjalla për kompani që kanë shkelur rregullativën ligjore, për të cilat Veriu.info kishte raportuar ekskluzivisht me emra.
Veriu.info ka siguruar vendimin e AUV, ku shihet se në mesin e kompanive që u ishte pezulluar leja e importit është edhe “HUDEA” Sh.P.K. me pronar Valmir Humolli me adresë në Podujevë.
Arsyeja e pezullimit të lejes së importit të kafshëve të gjalla për këtë kompani është se gjatë inspektimit të kryer nga inspektorët e AUV, është konstatuar se 2 mijë 277 gedhe të importuara nga kjo kompani janë ‘zhdukur’. Pra, nuk janë raportuar të therura në thertore të licencuar brenda 72 orësh pas hyrjes në Kosovë, ashtu siç përcaktohet decidivisht me akte ligjore.
Të pjesa e vendimit, ku shpjegohen gjetjet gjatë inspektimit të kompania “HUDEA” Sh.P.K., inspektorët e AUV kanë gjetur se kjo kompani në periudhën 1 janar 2025 deri 10 shkurt 2025 ka importuar në Kosovë 643 kafshë të gjalla, ku vetëm 9 prej tyre i ka dërguar në therore. Gjatë inspektimit është konstatuar se kafshët tjera nuk gjenden as në stallën e pronarit.
Në dokumentet e siguruara nga Veriu.info, shpjegohet se inspektorët e AUV kanë gjetur se “HUDEA” Sh.P.K. gjatë periudhës tetor – dhjetor 2024 kishte importuar në Kosovë 1 mijë 855 kafshë, të cilat duhet të thereshin brenda afatit 72 orësh në thertore të licencuar, por që nga ky numër rezultojnë 1 mijë 643 kafshë të paraportuara si të therura.
Pavarësisht këtyre të gjeturave, Komisioni i Ankesave i AUV ka vepruar njëjtë sikurse edhe rastet tjera, duke rekomanduar kthimin e lejes së importit për kompaninë “HUDEA” Sh.P.K., duke dhënë arsyetim skandaloz në paragrafin e parë: “Kompania “HUDEA” Sh.P.K. ka paraqitur ankesë ku ka prezantuar dokumentacionin e shitjeve të kafshëve, faturat e shitjes, libri i blerjeve dhe i shitjeve për periudhën 2025. Gjithashtu ka paraqitur edhe fakte tjera të cilat dëshmojnë shitjen e kafshëve”.
Pra, Komisioni i Ankesave e pranon si të mirëqenë faktin se “HUDEA” Sh.P.K. ka shitur kafshët, ani pse ato fillimisht duheshin therur brenda 72 orësh pas hyrjes në Kosovë dhe tek pastaj mishi i tyre mund të shitej.
Mos zbatimi i rregullativës ligjore për therjen e kafshëve të importuara brenda 72 orësh nga kompanitë importuese, shmang kontrollin e inspektorëve të AUV në lidhje me shëndetin e kafshëve dhe hap mundësinë kompanive që ato t’i therin ilegalisht apo t’i shesin, ku për pasojë vjen edhe deri të mundësia e evazionit fiskal dhe rrezikimit të shëndetit të konsumatorëve të mishit./Veriu.info
Skandal: “Bini 2024” shiti kundërligjshëm 499 kafshë të importuara për therje (Dokument)
