Autoritetet doganore suedeze kanë ndaluar importimin e një ngarkese prej më shumë se 9.6 tonësh produkte ushqimore të eksportuara nga Kosova, pasi gjatë kontrollit është konstatuar se ato përmbanin vezë.
Ngarkesa kishte mbërritur me kamion në pikën e zhdoganimit në Malmö dhe ishte deklaruar si produkte të kategorisë së biskotave dhe ëmbëlsirave.
Megjithatë, gjatë shqyrtimit të dokumentacionit, zyrtarët suedezë kanë vërejtur mospërputhje në të dhënat e deklaruara dhe kanë vendosur që ngarkesa të kontrollohej fizikisht.
Kontrolli ka zbuluar se produktet përmbanin vezë, çka ka bërë që importi të ndalohej.
Sipas autoriteteve suedeze, Kosova nuk bën pjesë në listën e vendeve të miratuara për eksportin e produkteve të kësaj kategorie që përmbajnë përbërës me origjinë shtazore, si vezët apo qumështi.
Autoritetet dyshojnë se deklarimi i pasaktë i përmbajtjes së produkteve mund të jetë bërë me qëllim të shmangies së kufizimeve për import.
Në total, ngarkesa përmbante pak më shumë se 9.6 tonë produkte ushqimore.
Pas ndalimit të importit, importuesi – një kompani suedeze me shumicë – është përballur me dy mundësi: kthimin e ngarkesës në vendin e eksportit ose asgjësimin e produkteve në Suedi.
Kompania ka zgjedhur që ngarkesa të kthehet në vendin e eksportit.
Autoritetet suedeze kanë theksuar se rregullat për importimin e produkteve ushqimore me origjinë shtazore nga vendet jashtë Bashkimit Evropian janë të rrepta.
Sipas tyre, kufizimet lidhen me nevojën për të parandaluar rreziqet që mund të paraqesin produkte të tilla për shëndetin e kafshëve dhe përhapjen e sëmundjeve, veçanërisht kur bëhet fjalë për produkte si mishi, qumështi dhe vezët.
