Gjykata Themelore në Mitrovicë ka refuzuar në tërësi padinë e kompanisë së rrjetit të supermarketeve “Viva Fresh Sh.P.K.” ndaj “Veriu.info Sh.P.K.”, me të cilën kishte kërkuar që të vërtetohet se portali Veriu.info kishte shpifur me rastin e publikimit të një shkrimi në vitin 2020 me titullin “Dëshmi të reja për shkeljet që ju bëhen punëtorëve nga kompania Viva Fresh (Foto)”.
Viva Fresh me 21.04.2020 kishte parashtruar padi pranë Gjykatës Themelore në Mitrovicë, ku ndër të tjera kishte kërkuar nga gjykata që të ndalë “shpifjet” ndaj këtij rrjeti të supermarketeve, duke pretenduar se Veriu.info me shkrimin titullin “Dëshmi të reja për shkeljet që ju bëhen punëtorëve nga kompania Viva Fresh (Foto)” kishte dëmtuar rëndë imazhin dhe reputacionin e Viva Fresh-it.
Me rastin e padisë, Viva Fresh kishte kërkuar nga gjykata që ta detyroj gazetën Veriu.info t’i paguajë shumën prej 2500 euro në emër të dëmit moral, ndërsa në emër të dëmit material po ashtu të paguajë shumën prej 2500 euro me kamatë vjetore prej 8%.
Pas shqyrtimit të padisë dhe dëgjimit të dy palëve, gjykata me aktgjykim ka vendosur që të refuzohet në tërësi kërkesëpadia e Viva Fresh ndaj Veriu.info, pasi që gjykata ka ardhur në përfundim se kërkesëpadia e paditësit është e pabazuar.
Gjykata me këtë aktgjykim e ka obliguar kompaninë Viva Fresh që gazetës Veriu.info t’i paguaj shpenzimet procedurale në lartësi prej 478.40 euro në afat prej 15 ditësh pas ditës së pranimit të këtij aktgjykimi, nën kërcënimin e përmbarimit me dhunë.
Në këtë proces gjyqësor kompaninë “Veriu Sh.P.K.” e kanë përfaqësuar avokatët Kastriot Feka e Besim Parduzi, ndërsa kompaninë “Viva Fresh Sh.P.K.” e ka përfaqësuar firma e Avokatisë ‘Kerveshi & Partners’
Këtu gjeni aktgjykimin e plotë të gjykatës: DOKUMENT
