Procesi gjyqësor ndaj ish-krerëve të Ushtrisë Çlirimtare të Kosovës në Dhomat e Specializuara në Hagë po hyn në fazën përfundimtare, pas një periudhe afro gjashtëvjeçare që ka përfshirë paraburgim të gjatë, seanca të shumta gjyqësore dhe një proces të ndjekur me vëmendje të lartë në Kosovë dhe në arenën ndërkombëtare.
Sipas zhvillimeve të fundit në Hagë, procesi ka hyrë në fazën e fundit pas përfundimit të dëshmive dhe paraqitjes së argumenteve përmbyllëse, ndërsa trupi gjykues tashmë është në fazën e shqyrtimit të materialit të rastit, i cili përfshin mijëra faqe dokumente dhe dëshmi të ndryshme të administruara gjatë viteve të gjykimit
Në këtë kontekst, përfaqësues të organizatave të dala nga lufta e UÇK-së dhe njohës të çështjeve juridike kanë dhënë qëndrimet e tyre, duke e vlerësuar procesin si të stërzgjatur dhe duke shprehur pritje për një vendim që, sipas tyre, duhet të reflektojë drejtësi dhe provat e paraqitura në gjykim.
Kryetari i Organizatës së Veteranëve të Luftës së UÇK-së, Hysni Gucati, ka deklaruar se procesi gjyqësor ndaj ish-krerëve të UÇK-së në Hagë është zgjatur më shumë seç është dashur dhe se, sipas tij, faktet dhe argumentet gjatë gjithë kohës kanë qenë në anën e të akuzuarve.
Gucati ka thënë se mbajtja e tyre në paraburgim për afro gjashtë vjet është e padrejtë dhe ka shprehur bindjen se gjykata duhet të japë një vendim lirues.
“Është zgjatur e stërzgjatur procesi në Hagë. Duke i ditur faktet dhe argumentet që gjithmonë kanë qenë në anën e krerëve, afër gjashtë vite mbahen padrejtësisht krerët e UÇK-së në Hagë. Ne e dimë se çfarë kontributi kanë dhënë ata për vendin dhe popullin tonë. Besojmë dhe shpresojmë fuqishëm që ata do të kthehen në gjirin familjar dhe në rrethin ku jetojnë dhe veprojnë, sepse ata luftuan për këtë popull”, ka deklaruar Gucati.
Ai ka shtuar se pritjet e veteranëve dhe bashkëluftëtarëve janë që procesi të përfundojë sa më shpejt dhe ish-krerët e UÇK-së të kthehen në Kosovë.
“Shpresa jonë është që drejtësia të vihet në vend dhe ky proces të marrë fund sa më parë. Familjet e tyre, bashkëluftëtarët dhe qytetarët kanë pritur gjatë për këtë moment. Ne besojmë se ata do të lirohen dhe do të kthehen pranë familjeve të tyre”, është shprehur ai.
Kryetari i Shoqatës së Familjeve të Dëshmorëve të UÇK-së, Xhavit Jashari,në një prononcim për FrontOnline ka deklaruar se me afrimin e përfundimit të procesit gjyqësor në Hagë, pritjet e familjeve të dëshmorëve dhe të ish-pjesëtarëve të UÇK-së janë që ish-krerët e saj të shpallen të pafajshëm. Sipas tij, lufta e Ushtrisë Çlirimtare të Kosovës ka qenë e drejtë dhe e pastër, ndërsa çdo përpjekje për ta paraqitur ndryshe bie ndesh me sakrificën e atyre që luftuan dhe dhanë jetën për lirinë e vendit.
Kryetari i Shoqatës së Familjeve të Dëshmorëve të UÇK-së, Xhavit Jashari, ka deklaruar se pret që Gjykata Speciale të shpallë të pafajshëm ish-krerët e UÇK-së, duke e cilësuar procesin si të padrejtë dhe duke vlerësuar se lufta çlirimtare e Kosovës nuk mund të kriminalizohet.
“Gjykata Speciale është gjykatë e padrejtë. Vetë krijimi i saj ka qenë i dyshimtë për faktin se është krijuar në bazë të një raporti shpifës të Dick Martyt. Tani jemi në përfundim të gjykimit dhe ne shpresojmë shumë që ata të lirohen. Është e padrejtë nëse vendoset të dënohen, sepse lufta jonë ka qenë e drejtë dhe e pastër. Pretendimet e prokurorisë janë fyese, por ne shpresojmë që gjykata të marrë një vendim lirues”, ka deklaruar Jashari.
Ai ka thënë se një vendim dënues ndaj ish-krerëve të UÇK-së do të interpretohej si dënim ndaj vetë Ushtrisë Çlirimtare të Kosovës.
“Nëse qoftë edhe një ditë dënohen krerët e UÇK-së, i bie që dënohet Ushtria Çlirimtare e Kosovës. Edhe faktori ndërkombëtar duhet ta dijë se nëse dënohen këta, preket liria e shtetit të Kosovës. Mendoj se nuk ka forcë as vendore e as ndërkombëtare që e kriminalizon luftën tonë të pastër”, është shprehur ai.
Jashari ka thënë se lufta e UCK-së ka qenë e drejte dhe se presin lirimin e ish-krerëve të saj.
“Ne e dimë që lufta jonë ka qenë e drejtë dhe e pastër dhe shpresojmë shumë që sa më parë të lirohen krerët e UÇK-së”, ka deklaruar Jashari.
Avokati Arbër Jashari ka vlerësuar se procesi gjyqësor ndaj ish-krerëve të UÇK-së në Hagë është shoqëruar me një sërë parregullsish dhe me shkelje të të drejtave të të pandehurve, veçanërisht për shkak të kohëzgjatjes së paraburgimit dhe gjykimit.
“Konsideroj që procesi në Hagë është përcjellë me shumë parregullsi dhe shkelje të të drejtave të të pandehurve, pra të katërshes së UÇK-së. Një nga padrejtësitë më të mëdha është që kemi pasur një paraburgim të stërzgjatur dhe një gjykim të stërzgjatur. Gjithsesi është mirë që ky gjykim po vjen drejt fundit”, ka deklaruar Jashari.
Sipas tij, provat e paraqitura gjatë procesit favorizojnë lirimin e ish-krerëve të UÇK-së.
“Unë dua të besoj që gjykata do të bëjë një aktgjykim të drejtë ku do të lirohen krerët nga akuzat, kjo pasi që provat liruese janë shumë të forta dhe i mbizotërojnë të gjitha provat ku krerët akuzohen”, ka thënë ai.
Avokati Arbër Jashari ka vlerësuar se procesi gjyqësor në Hagë ndaj ish-krerëve të UÇK-së është zgjatur përtej çdo kufiri të arsyeshëm kohor. Ai po ashtu ka thënë se kjo gjykatë ka dëshmuar që nuk ka të bëjë vetëm me drejtësi por është edhe e politizuar .
“Unë shpresoj që ky gjykim nuk do të zgjatet më tepër sepse i ka tejkaluar limitet. Kjo gjykatë ka dëshmuar që nuk kemi të bëjmë vetëm me drejtësi, është pak edhe politike si çështje”, ka deklaruar avokati Arbër Jashari./Front Online
