Analisti politik Visar Ymeri, ka komentuar paralajmërimin e Bashkimit Evropian për masa të reja ndaj Kosovës, nëse situata nuk ndryshon.
Ymeri në një prononcim për GazetaBlic, thotë se masat kanë për qëllim t’i parandalojnë veprimet të cilat shihen si tensionuese dhe kushtëzojnë vazhdimin e dialogut dhe implementimin e marrëveshjeve.
Tutje, ai thotë se është frustruese fakti që vetëm Kosova po shihet si problem drejt zbatimit të marrëveshjes dhe vazhdimit të dialogut
“Është qasja që BE e ka pasur deri tash karshi Kosovës – masat kanë për qëllim t’i parandalojnë veprimet që shihen si tensionuese dhe njëkohësisht të kushtëzojnë vazhdim të dialogut dhe implementim të marrëveshjeve. Është e vërtetë dhe tejet frustruese fakti që vetëm Kosova si palë po shihet si problem drejt zbatimit të marrëveshjes dhe vazhdimit të dialogut kur në anën tjetër Serbia po ashtu bën shumë veprime të rrezikshme e që e pengojnë normalizimin e marrëdhënieve”, tha ai.
Sipas Ymerit, kemi një dështim të diplomacisë së Kosovës, të cilët në asnjë mënyrë nuk kanë arrit mbështetje për veprimet e drejta ligjore të Kosovës.
Ai thotë se i gjithë ky degradim i pozicionit të Kosovës po vjen si pasojë e sjelljes së papërgjegjshme të kryeministrit Kurti tash e sa vite.
“Mirëpo këtu kemi një dështim flagrant të diplomacisë së Kosovës (prej KM e deri te Ministrja) të cilët në asnjë mënyrë nuk kanë arritur mbështetje për veprimet e drejta e ligjore të Kosovës. Ky degradim i pozicionit të Kosovës dhe lëndim i kredibilitetit tonë vjen si pasojë e sjelljes së papërgjegjshme e të paparashikueshme të KM Kurti tash e sa vite. Pasojat e kësaj sjelljeje po i ndiejmë tash. Dhe jo vetëm në aspektin e sanskioneve financiare por edhe në rrafshim e vendimeve e qëndrimeve politike”, përfundoi Ymeri.
