Ish- ambasadori i Kosovës në Shqipëri, Ramiz Lladrovci, në një prononcim për Gazeta Blic, ka folur për anulimin e mbledhjes së dy qeverive shqiptare nga ana e kryeministrit të Shqipërisë, Edi Rama.
Ai e sheh si shumë negative anulimin e kësaj mbledhje dhe se është gabim që ka ardhur deri te anulimi i saj, marrë parasysh dhe situatën aktuale.
“E vlerësoj si shumë negative edhe për situatën që ndodhemi si shtete e si komb por edhe gjeopolitikës ballkanike. Me plot gojën e them se është gabim pse ka ardhur deri te anulimi”, thotë Lladrovci.
I pari i komunës së Drenasit, vlerëson se nuk ka rëndësi se kush e ka anuluar mbledhjen por arsyet se pse erdhi deri këtu, teksa thotë se duhet t’i vijë turp kujtdo që ka punuar që raportet tona kombëtare të ftohen.
“Mua nuk më intereson se kush e anuloi, mua më dhemb pse u anulua, shkaqet pse erdhi deri te anulimi. Unë politikën dhe interesin nacional i shoh ndryshe dhe mbi ndikimet ditore dhe përshtypjet politike të çastit, nuk i gjykoj individët as personazhet e kësaj ngjarje, por, ftohjen në raportet tona brenda kombëtare. Kush ka punuar që të arrihet deri te kjo pikë, marre i qoftë, le ta dijë se nuk ka bërë politikë por sabotim të interesit nacional”, potencon ai për Gazeta Blic.
Sipas Lladrovcit, fajtori mbetet jetim, ndërsa që anulimi është dimri në mes pranvere të dy liderëve shqiptarë dhe do të shënohet në histori si shembull i dështimit të diplomacisë.
“Faji do të mbetet jetim, ndërsa akti i anulimit shënon dimrin në mes pranvere të dy liderëve, dhe konsideroj se do të shënohet në histori si shembull i dështimit të diplomacisë dhe zhvillimit tonë kombëtar e institucional. Nuk mund të flas për kush, por pyes, pse? Është gabim të cilin duhet filluar menjëherë ta riparojnë akterët, nuk bëhet fjalë për dy individë e dy parti politike, por për dy shtete sovrane me lidhje të pashkëputshme, të pandashme nga fati historik dhe rruga integruese euro-atlantike”, vlerëson ai.
Lidhur me lëkundjen e raporteve Kosovë-Shqipëri me këtë veprim, ish ambasadori thotë se mund të ketë vetëm lëkundje të simpatizantëve që nuk e njohin historinë dhe se Kosova e Shqipëria do të vazhdojnë të jenë më mirë e më të zhvilluara, drejt familjes së madhe euroatlantike.
“Mund të ketë lëkundje të simpatizantëve jo tolerantë që nuk e njohin historinë, që nuk i njohin sakrificat e një kombi, nuk i njohin vetitë e veta nacionale, nuk e njohin vetën as rrugën si erdhëm deri këtu si dy shtete dhe me një fat nacional. Njeriu normal, me edukatë normale, familjare e atdhetare, nuk e lejon të ketë lëkundje, as nuk do të merret me aksidentin e çastit dhe nuk do të lejojnë të quhet as lëkundje, por mosmarrëveshje e panevojshme. Shqipëria e Kosova do të vazhdojnë të jenë çdo ditë e më të mira e më të zhvilluara, me synim përqafimin sa më të shpejtë të vlerave brenda familjes së madhe euro-atlantike”, deklaron Ramiz Lladrovci./Gazeta Blic/
