Ndoshta secili prej jush ka një shishe parfumi të preferuar që e përdor vetëm për raste të veçanta dhe përpiqet që të zgjasë sa më shumë që të jetë e mundur, kështu që e ruani në një vend të veçantë dhe nuk jeni shpërdorues, megjithatë nuk mund t’ia zgjatni kohën e përdorimit në atë mënyrë.
Kohëzgjatja e validitetit të parfumit është rreth dy vjet (varësisht nga lloji) dhe kini parasysh që pas hapjes së shishes, jetëgjatësia e tij zvogëlohet dhe oksidohet.
Nëse e mbani parfumin në një vend të ndritshëm dhe të ngrohtë, ekspertët thonë se procesi i oksidimit do të përshpejtohet. Kjo është arsyeja pse nuk është ide e keqe ta mbani çdo parfum në kutinë e tij origjinale ose në një dollap larg rrezeve të diellit.
Afati i ruajtjes së parfumit varet gjithashtu nga temperatura në të cilën e ruani. Ka edhe nga ata admirues të pasionuar që për ta zgjatur jetëgjatësinë e aromës së tyre të preferuar, i mbajnë parfumet në frigorifer.
Mënyra më e mirë për ta kontrolluar nëse një parfumi i ka skaduar koha e përdorimit, është ta spërkatni në një copë letër dhe të shihni nëse ka erë të njëjtë si më parë. Nëse mbani një parfum të pahapur në koleksionin tuaj të parfumeve, mos u shqetësoni, validiteti është shumë më i gjatë në atë rast. Por, pas hapjes së shishes, bëni kujdes, sepse nuk preferohet ta përdorni për më shumë se dy vjet.
Mos e mbani kurrë parfumin në banjë pranë burimeve të ujit ose nxehtësisë. Mbajeni në një dollap, në një vend të freskët dhe të errët. Molekulat e parfumit do të zgjasin më shumë, dhe për këtë arsye parfumi juaj do të jetë me cilësi më të lartë.
