Kryetari i BDI-së, Ali Ahmeti, vlerësoi lartë luftëtarët e UÇK-së, duke i quajtur “klasa më e lartë e sakrificës dhe angazhimit” që bëri të mundur krijimin e shtetit të Kosovës. Në pritjen e veteranëve të UÇK-së, të organizuar nga kreu i AAK-së, Ramush Haradinaj, Ahmeti theksoi rëndësinë e bashkimit mes shqiptarëve, duke apeluar për unitet të fortë kombëtar.
“Ju më të merituarit e UÇK-së, ju fitimtarët që i dhatë gjymtyrët atdheut por të mbijetuar nderoni të gjithë të rënit kujtoni buzëqeshjen që akoma ajo buzëqeshje reflekton mbi Kosovën, të Luan Haradinaj, e komandanti legjendar Adem Jashari, ju jemi klasa më e lartë e sakrificës e angazhimeve që Kosova sot është shtet, por ama misionet ende nuk kanë mbaruar, nëse doni të zgjeronin tokat e Serbisë ngushtoni hapësirat e shqiptarëve, më shumë se sot na duhet uniteti të jemi krahë i njëri-tjetrit”, u shpreh Ahmeti, transmeton Klan Kosova.
Ai shprehu gjithashtu shqetësimin për përkeqësimin e marrëdhënieve me Shtetet e Bashkuara dhe Bashkimin Evropian, duke rikujtuar rolin vendimtar të aleatëve ndërkombëtarë në çlirimin e Kosovës.
“Nuk më vjen mirë që marrëdhëniet janë aq të ftohta me Amerikën dhe Evropën sepse pa ndihmën e tyre ne shumë vështirë do e kishim, ne lirinë e fituam dhe lamë me gjak por bashkë me aleatët e çliruam Kosovën. Nuk më vjen mirë që gjuha shqipe nuk është gjuha zyrtare në Maqedoni, që për atë gjuhë ata kanë derdhur gjakun. Na duhet akoma vendim e veprim i përbashkët, i kemi ngritur bashkë të gjitha ushtritë e proceset. Ti shpiem bashkë deri në anëtarësimin e Kosovës në NATO, e në Bashkimin Evropian dhe të jetojmë të lirë në paqe dhe në sovranitet”, tha ai.
