Kryesuesi i Këshillit Prokurorial të Kosovës, Ardian Hajdaraj shprehu mbështetjen e plotë për Prokurorinë Speciale ndërsa tha se të gjithë janë të barabartë para ligjit”, kur iu përgjigj një pyetjeje lidhur me deklaratat e kryeministrit Albin Kurti, i cili e sulmoi këtë organ të akuzës, duke i quajtur prokurorët “lepuj të shpejtë” kur bëhet fjalë për ndjekjen ndaj njerëzve të pushtetit aktual.
Sa i përket deklaratave të kryeministrit, nuk i komentojmë deklaratat politike”, tha fillimisht Hajdaraj.
“Diçka mund të them. Ne kemi reaguar shpesh ndaj sulmeve që na janë bërë nga këto deklarata politike. Nuk kam çka shtoj”, shtoi kreu i KPK-së, ndërsa tha se kryeprokurori i Prokurorisë Speciale do të përgjigjet “më në detaje” lidhur me deklaratat e kryeministrit.
“Këshilli Prokurorial ia jep mbështetjen e plotë Prokurorisë Speciale në zbatimin e mandatit kushtetues dhe ligjor që ka dhe të gjithë janë të barabartë para ligjit. Kjo është e tëra çfarë mund të them sa i përket kësaj pyetjeje”, tha Hajdaraj.
Kurti nuk i është përgjigjur pozitivisht ftesës së Prokurorisë Speciale për të dëshmuar në këtë organ të akuzës. Prokurorët, i ka ftuar ta intervistojnë në zyrën e tij në Qeveri.
“Unë guxoj t’ju them s’po vij. Ta shohim tash a guxojnë ata të vijnë”, tha kryeministri mbrëmë në podcastin “Rrjedha” në KTV.
