Në seancën e nesërme të Kuvendit Komunal të Mitrovicës si pikë kryesore e rendit të ditës, po vlerësohet të jetë “Propozim vendim për miratimin e Hartës Zonale të Komunës së Mitrovicës së Jugut (HZK) 2024-2032”.
Harta Zonale Komunale është një dokument shumë i rëndësishëm i planifikimit hapësinor në nivel lokal, i cili i përcakton kushtet ndërtimore deri në nivel të parcelës, dhe vlen deri për vitin 2032
Miratimi i këtij dokumenti do t’i jep shtytje zhvillimit ekonomik të Mitrovicës, duke rregulluar planin urbanistic të qyteti për vitet e ardhshme.
Mirëpo, hezitues për miratimin e këtij dokumenti është partia më e madhe opozitare, Lëvizja Vetëvendosje në Mitrovicë, e cila para tre ditësh ka mbajtur një mbledhje të Kryesisë dhe grupit të asamblistëve në Mitrovicë, ku ka pasur kundërshtime mes tyre se a duhet të votohet ky dokument të hënën në seancën e Kuvendit Komunal të Mitrovicës.
Për shkak të qendrimeve të brendshme “për” dhe “kundër”, kjo parti ka vendosur që mbledhjen e së enjtes, ta vazhdoj sot (e diele) në ora 18:00, ku pritet të merret qendrim përfundimtar se a do ta votojë grupi i asamblistëve të VV-së nesër në Kuvend Komunal këtë pikë.
Interesant është fakti se ky dokument strategjik komunal kishte nisur në kohën kur Komunën e Mitrovicës e Qeveriste LVV, pra në mandatin qeverisës 2017-2021. Madje, edhe kontratën për hartimin e këtij draft-dokumenti komuna e kishte nënshkruar me një kompani private në qeverisjen e kaluar. Por për shkak se LVV i kishte humbur zgjedhjet komunale më 2021, hartimi i këtij dokument kishte vazhduar në mandatin qeverisës të PDK-së (2021-2025).
Pra, edhe përkundër që vet e nisën hartimin e këtij dokumenti, por e lanë në fazë fillestare për shkak të humbjes, eksponentë me ndikim brenda LVV po e kundërshtojnë miratimin e tij në Kuvend Komunal, gjë që përbën një veprim mjaft të çuditshëm.
Sidoqoftë, duke qenë së gjendemi në vit zgjedhor, vetëm pak muaj para zgjedhjeve lokale, partitë edhe ndodh të bëjnë kalkulime të tilla politike, po që në fund faturën po e “paguan” qytetari i rëndomtë.
