Veriu.info ka raportuar javën e kaluar se si AUV ka nisur shfuqizimin e vendimeve për pezullim të licencave për import të kafshëve të gjalla, vetëm pak ditë pasi që ministri i Bujqësisë në detyrë, Faton Peci, i cili kishte thënë se prokuroria posedon faktet për falsifikim të dokumentacioneve nga operatorë të caktuar ekonomikë, ku ai pretendonte se dëmi financiar i shkaktuar nga këta operatorë ekonomik është qindra miliona euro.
Më datë 23 prill Veriu.info kishte kërkuar qasje ne dokumente publike në Agjencinë e Ushqimit dhe Veterinarisë në vendimet për pezullimin e lejeve të importit të kafshëve të gjalla për 28 operatorët ekonomik.
Sipas Ligjit për Qasje në Dokumente Publike, afati për dhënien e qasjes në dokumente publike është shtatë (7) ditë.
Kur jemi në ditën e nëntë (9) prej kërkesës së parashtruar, AUV që udhëhiqet nga drejtori ekzekutiv, Bekim Hoxha, akoma nuk ka ofruar qasje, edhe pse ligjërisht është i obliguar për një veprim të tillë.
Se çka po fsheh drejtori i AUV, Bekim Hoxha, duke mos na dhënë qasje në dokumente, siç e parasheh ligji, këtë akoma nuk mund ta dimë, por Veriu.info do të vazhdoj të ndjek rrugët e parapara ligjore për zbardhjen e këtij rasti.
Por ajo që dihet deri më tash është se AUV dhe ministri i Bujqësisë në detyrë, Faton Peci, kanë dhënë njoftime kontradiktore për arsyen e pezullimit të lejeve të importit të kafshëve për këta 28 operatorë ekonomik.
Ministri i Bujqësisë në detyrë, Faton Peci, për rastin e pezullimeve të këtyre lejeve të importit ndër të tjera, kishte shkruar: “Vetëm në periudhën e fundit tre mujore si rezultat i veprimeve proaktive janë ndërmarrë këto hapa: 28 operatorëve ekonomikë, iu janë pëzulluar lejet e importit të kafshëve të gjalla nga vendet e Rajonit dhe Bashkimit Evropian; Prokuroria posedon faktet edhe për falsifikim të dokumentacioneve nga operatorë të caktuar ekonomikë. Dëmi financiar i shkaktuar Republikës së Kosovës nga këta operatorë ekonomikë është qindra miliona euro, ndërsa dëmi në cënimin e sigurisë ushqimore është i pakthyeshëm dhe i papërllogaritshëm!”
Përderisa, AUV në një përgjigje paraprake për Veriu.info nuk kishte përmendur dëm financiar të shkaktuar nga këta operatorë ekonomik, e as ‘qindra miliona euro’ dëm financiar, siç ka njoftuar Faton Peci.
“Agjencia e Ushqimit dhe Veterinarisë në kuadër të kontrollit të therjeve të kafshëve të gjalla të importuara, ka analizuar të dhënat e fundit raportuese në sistemin elektronik. Përmes të cilit është gjetur mospërputhje e të dhënave të numrit të kafshëve të importuara për therje dhe numrit të kafshëve të therura në thertore. AUV menjëherë ka nisur pezullimin e përkohshëm të operatorëve ekonomik të regjistruar në sistemin elektronik FCMS. Ne ketë pezullim janë përfshirë 28 subjekte. Gjithmonë në zbatim të ligjit të përgjithshëm të procedurës administrative gjegjësisht parimit për të drejtën në ankesë. Të gjithëve në këshillë juridike të vendimit u është bërë e njohur mundësia e paraqitjes se ankesës në komision të ankesave në AUV”, thuhet në përgjigjen e AUV.
