Lideri i Lidhjes Demokratike të Kosovës, Lumir Abdixhiku dhe ai i Nismës Socialdemokrate, Fatmir Limaj sot kanë pasur një takim ‘kokë me kokë’.
Gazeta Blic ka marrë vesh se takimi i cili ka zgjatur për më shumë se një orë e 30 minuta, sapo ka përfunduar.
“Abdixhiku e Limaj kanë pasur një takim që ka zgjatur për më shumë se një orë e gjysmë. Aty është biseduar për situatën aktuale politike”, thanë burime të Gazeta Blic.
Këto burime ndonëse nuk kanë saktësuar nëse ka pasur ndonjë dakordim ndërmjet dy liderëve në lidhje me krizën politike në vend, megjithatë këto burime shtojnë se takimi ka shkuar në atmosferë të mirë dhe është diskutuar për rrugën për dalje nga kriza politike.
Ndërkaq, as nga LDK s as nga Nisma nuk kanë dhënë detaje nga ky takim.
Ndryshe, Kuvendi i Kosovës për 33 herë radhazi ka dështuar që të konstituohet.
Vetëvendosje vazhdon të këmbëngul që Albulena Haxhiu duhet të jetë kryetare e Kuvendit, derisa opozita e ka vlerësuar figurën e saj si konfliktioze.
Në anën tjetër, Limaj më herët ka pasur takim me kryetarin e VV-së, Albin Kurti, por pa ndonjë marrëveshje konkrete, për faktin se kreu i Nismës e ka kërkuar pikërisht postin e kryetarit të Kuvendit.
E, lideri i LDK-së, Lumir Abdixhiku derisa ka reguzuar ftesën e Kurtit për koalicion të mundshëm, ai ka propozuar një Qeveri Uniteti.
Ndryshe, kanë kaluar katër muaj që kur kanë përfunduar zgjedhjet e përgjithshme, dhe Kosova vazhdon të mos ketë institucione.
