Drejtoresha e Inteligjencës Kombëtare (DNI) Tulsi Gabbard ka thënë se beson në ekzistencën e alienëve, por theksoi se duhet të jetë “e kujdesshme” kur flet publikisht, pasi ka qasje në shumë informacione të klasifikuara.
Gjatë një interviste për podkastin “Under Force One”, prezantuesja Miranda Devine e pyeti Gabbard drejtpërdrejt: “A mund të ekzistojnë alienët?”
“Unë kam mendimet dhe pikëpamjet e mia,” u përgjigj Gabbard, duke shtuar: “Në këtë pozicion, duhet të jem e kujdesshme me atë që ndaj.”
Kur prezantuesja e pyeti përsëri nëse ajo personalisht beson në ekzistencën e alienëve dhe objekteve fluturuese të paidentifikuara (UFO), Gabbard u përgjigj: “Po.”
Tema e alienëve dhe UFO-ve, që sot quhen gjithnjë e më shumë fenomene anomale të paidentifikuara, ka shkaktuar teori të ndryshme konspiracioni për dekada të tëra. Disa anëtarë të Kongresit Amerikan po hetojnë aktualisht se çfarë di në të vërtetë qeveria federale për këtë temë.
Vetëm vitin e kaluar, Nënkomisioni i Dhomës së Përfaqësuesve për Sigurinë Kombëtare, Kufirin dhe Punët e Jashtme mbajti disa seanca dëgjimore mbi këtë çështje.
Tulsi Gabbard, një nga bashkëpunëtoret më të ngushta të Presidentit Donald Trump, theksoi se zyra e saj aktualisht nuk ka informacion specifik për të ndarë me publikun në lidhje me alienët dhe UFO-t. Megjithatë, ajo premtoi të jetë transparente kur të vijë koha.
“Ne vazhdojmë të kërkojmë të vërtetën dhe ta ndajmë atë të vërtetë me popullin amerikan”, tha ajo.
Si Drejtoreshë e Inteligjencës Kombëtare, Gabbard mbikëqyr koordinimin midis 18 agjencive të inteligjencës së Amerikës.
