Volodymyr Zelensky thotë se nuk ka asnjë shenjë që Rusia po përgatitet për paqe, ndërsa Putini dhe Trumpi nisen për në Alaskë për të diskutuar konfliktin në Ukrainë, shkruan BBC.
“Në ditën e negociatave, ata gjithashtu vrasin njerëz. Kjo flet shumë”, thotë presidenti ukrainas në një postim në Telegram.
“Lufta vazhdon”, shton ai. “Ajo vazhdon pikërisht sepse nuk ka as urdhër, as ndonjë tregues se Moska po përgatitet ta përfundojë këtë luftë.”
Kreu i rajonit të Dnipropetrovskut, Serhiy Lysak, tha më herët se një burrë ka vdekur dhe një tjetër është plagosur nga një sulm me raketa ruse mbi trafikun në afërsi të qytetit Dnipro, në Ukrainën lindore.
Në Sumy, në verilindje të Ukrainës, raportohet për një zjarr që ka shpërthyer pas një sulmi rus që kishte në shënjestër një treg në pjesën qendrore të qytetit. Autoritetet lokale thonë se numri i viktimave është ende duke u sqaruar.
